កីឡាករវ័យក្មេង ឆុង វិសាល ឬ សៅយ៉ាន់ វិសាល ដែលកំពុងល្បីនៅបារ៉ែនពិសេសគឺការប្រកួតនៅទីនោះឈ្នះ៤ប្រកួតជាប់គ្នា និងចាញ់ ១ប្រកួតចុងក្រោយវគ្គផ្ដាច់ព្រ័ត្រទទួលបានមេដាយប្រាក់ជូនប្រទេសកម្ពុជាក្នុងព្រឹត្តិការណ៍កីឡាយុវជនអាស៊ី លើកទី៣ ឆ្នាំ២០២៥ ។
តោះមកដឹងពីប្រវត្តិកីឡាករវ័យក្មេងរបស់កម្ពុជារូបនេះទាំងអស់គ្នា។៖
ឆុង វិសាល ឬឈ្មោះក្នុងប្រដាល់ហៅថា សៅយ៉ាន់ វិសាល មានអាយុ ១៦ឆ្នាំ កម្ពស់ ១.៧៥Cm សឹក្សាថ្នាក់ទី១១ នៅឆ្នាំថ្មីនេះ នៃវិទ្យាល័យឥន្ទ្រទេវី ខណ្ឌទួលគោក រាជធានីភ្នំពេញ។ វិសាល មានឪពុកឈ្មោះ សាន សៅយ៉ាន់ និងម្ដាយឈ្មោះ ទូច គិមសៀន។ កូនប្រុសលោក សាន សៅយ៉ាន់ រូបនេះមានបងប្អូន៤នាក់ ស្រី១ ប្រុស៣ ហើយរូបគេជាកូនទី២ នៃគ្រួសារ។ វិសាល និងក្រុមគ្រួសារជាអ្នកខេត្តបន្ទាយមានជ័យ។
ងាកមកនិយាយពីវិស័យប្រដាល់គុនខ្មែរវិញកីឡាករ ឆុង វិសាល ស្រឡាញ់ចូលចិត្តកីឡាមួយនេះតាំងតែពីតូចមកម្ល៉េះ និងឆ្លៀតពីការសិក្សាបានហ្វឹកហាត់ ឬឡើងប្រកួតតាមកម្មវិធីតូចធំតាំងពីនៅឯស្រុកកំណើតខេត្តបន្ទាយមានជ័យមកម្ល៉េះ។
បច្ចុប្បន្ននេះ វិសាល ជាកីឡាករជម្រើសជាតិផ្នែកកីឡាឃីកបុកស៊ីង (Kick Boxing) ដែលកំពុងហ្វឹកហាត់ជាប្រចាំ និងបានឡើងប្រកួតគុនខ្មែរតាមស្ថានីយទូរទស្សន៍ ឬសង្វៀននានាជាបន្តបន្ទាប់មកដែរ។ ដោយសារតែជាប់សិក្សាផងនោះទើបកូនប្រុសលោក សាន សៅយ៉ាន់ រូបនេះមិនសូវប្រកួតញឹកញ៉ាប់ដូចកីឡាករដទៃនោះឡើយ។
ឆុង វិសាល មានប្រវត្តិប្រកួត ៣៤ដង ឈ្នះ៣០ដង ស្មើ៣ និងចាញ់១ (មិនរាប់ការប្រកួតនៅប្រទេសបារ៉ែន)។ រូបគេធ្លាប់ឈ្នះមេដាយប្រាក់ ១គ្រឿងលើប្រភេទទម្ងន់ ៤៥គីឡូក្រាមកីឡាឃីកបុកស៊ីងក្នុងព្រឹត្តិការណ៍កីឡាជាតិ។ ឈ្នះមេដាយសំរឹទ្ធ ១គ្រឿងលើប្រភេទទម្ងន់ ៥១គីឡូក្រាមក្នុងកម្មវិធីជើងឯកថ្នាក់ជាតិ។ ឈ្នះមេដាយមាស ១គ្រឿងលើប្រភេទទម្ងន់ ៥១គីឡូក្រាមក្នុងព្រឹត្តិការណ៍ប្រកួតឃីកបុកស៊ីងជើងឯកអាស៊ីអាគ្នេយ៍កម្ពុជាជាម្ចាស់ផ្ទះ និងចុងក្រោយនេះឈ្នះមេដាយប្រាក់ ១គ្រឿងលើប្រភេទទម្ងន់ ៥៤គីឡូក្រាមក្នុងព្រឹត្តិការណ៍កីឡាយុវជនអាស៊ី លើកទី៣ ឆ្នាំ២០២៥ នៅឯប្រទេសបារ៉ែន៕
ប្រភព៖ KAMPUCHEATHMEY
