ជំនួបដណ្តើមពានរង្វាន់ Finalissima ដែលជាការប្រជែងរវាងម្ចាស់ជើងឯកទ្វីបអាម៉េរិកខាងត្បូង (CONMEBOL) និងម្ចាស់ជើងឯកអឺរ៉ុប (UEFA) នឹងត្រូវរៀបចំឡើងនៅថ្ងៃទី២៧ ខែមីនា ឆ្នាំ ២០២៦។ ការប្រកួតនេះនឹងក្លាយឱកាសស្ទាបស្ទង់សមត្ថភាពជើងខ្លាំងទាំង ពីរទ្វីប មុនព្រឹត្តិការណ៍ FIFA World Cup ឆ្នាំ ២០២៦ ដោយអាហ្សង់ទីនមានភារកិច្ចការពារតំណែងជើងឯករបស់ខ្លួន ពីការប្រជែងរបស់អេស្ប៉ាញ។
ពានរង្វាន់ Finalissima ជាឈ្មោះចុងក្រោយបង្អស់ដែលអ្នករៀបចំបានដាក់ ហើយដំបូងឡើយពានរង្វាន់នេះ ត្រូវបានគេស្គាល់ឈ្មោះថា European/South American Nations Cup។ បន្ទាប់មកវាបានប្តូរឈ្មោះទៅជាពានរង្វាន់អន្តរទ្វីប Intercontinental Cup វិញ ហើយធ្លាប់រៀបចំឡើងតែ ៣លើកប៉ុណ្ណោះ ក្នុងឆ្នាំ ១៩៨៥, ១៩៩៣ និងនៅឆ្នាំ ២០២២។ ក្រុមដែលមានសិទ្ធិចូលការប្រកួតពានរង្វាន់នេះ ត្រូវបានកំណត់តែលើក្រុមដែលឈ្នះជើងឯកទ្វីបអាម៉េរិកខាងត្បូង និងអឺរ៉ុបតែប៉ុណ្ណោះ។
បើតាមការចុះផ្សាយរបស់កាសែតអេស្ប៉ាញ RTVE ជំនួបពានរង្វាន់ FInalissima រវាងក្រុមបាល់ទាត់ជម្រើសជាតិអាហ្សង់ទីនម្ចាស់ជើងឯក Copa America ឆ្នាំ ២០២៤ ទល់នឹងអេស្ប៉ាញ ម្ចាស់ពាន Euro ឆ្នាំ២០២៤ នឹងរៀបចំឡើងនៅថ្ងៃទី២៧ ខែមីនា ឆ្នាំ ២០២៦។
អាហ្សង់ទីនជាក្រុមកាន់កាប់តំណែងជើង Finalissima ឆ្នាំ ២០២២ មក ដោយកាលនោះ ពួកគេបានផ្តួលអ៊ីតាលី ម្ចាស់ជើងឯក Euro ឆ្នាំ ២០២០ ក្នុងលទ្ធផល ៣-០ ក្នុងកីឡដ្ឋាន Wembley ទីក្រុងឡុងដ៏។ ជ័យជម្នះទល់អ៊ីតាលី ក្លាយជាការសាកល្បងសមត្ថភាពដ៏សំខាន់មួយ នៅក្នុងដំណើរនៃការប្រជែងពានរង្វាន់បាល់ទាត់ពិភពលោកយ៉ាងជោគជ័យរបស់អាហ្សង់ទីននៅទឹកដីកាតាផងដែរ។
នៅពេលនេះអាហ្សង់ទីនមានឱកាសមកប្រជែងពាន Finalissima ជាថ្មីម្តងទៀត ហើយគូប្រជែងរបស់ពួកគេគឺជាក្រុមអេស្ប៉ាញជើងខ្លាំងប្រចាំ Euro ឆ្នាំ ២០២៤ នេះឯង។
កាលព្រឹត្តិការណ៍ Euro ឆ្នាំ ២០២៤ អេស្ប៉ាញបានផ្តួលក្រុមអង់គ្លេស នៅវគ្គផ្តាច់ព្រ័ត្រលទ្ធផល ២-១ នៅក្នុងកីឡដ្ឋានអូឡាំពិក ទីក្រុងប៊ែឡាំង ប្រទេសអាល្លឺម៉ង់។ នោះជាការជួបរឿងខកចិត្តជាលើកទី២ សម្រាប់អង់គ្លេស ដែលចាញ់វគ្គផ្តាច់ព្រ័ត្រ Euro ២លើកជាប់ៗគ្នា។ អេស្ប៉ាញវិញចាយពេល ១៤ឆ្នាំ ទើបរកឃើញភាពខ្លាំងត្រឡប់មកវិញ ហើយអាចសមត្ថភាពប្រជែងឈ្នះក្រុមខ្លាំងៗកម្រិតតំបន់ និងពិភពលោកវិញបាន។
កាលពីពេលថ្មីៗនេះ អេស្ប៉ាញទាំង ដណ្តើមបានកៅអីទៅកាន់ព្រឹត្តិការណ៍ World Cup ឆ្នាំ ២០២៦ ដែលគ្រោងធ្វើឡើងនៅអាម៉េរិក កាណាដា និងម៉ិកស៊ិក ដូចទៅនឹងអាហ្សង់ទីនដែរ។
Finalissima ប្រៀបបានជាការតេស្តសមត្ថភាពដ៏ល្អបំផុត សម្រាប់ក្រុមជើងឯកតំបន់ទាំង ២ នៅមុនពេលធ្វើដំណើរទៅ World Cup ឆ្នាំ ២០២៦។ ទាំង ២ក្រុម បច្ចុប្បន្នសុទ្ធសឹងតែមានកីឡាករវ័យក្មេងកំពុងតែលេចធ្លោរខ្លាំងលើកម្រិតសមត្ថភាព ក៏ដូចជាការប្រកួតប្រជែងកម្រិតពិភពលោកដូចៗគ្នា។ បើទោះអាហ្សង់ទីនធ្លាប់ឈ្នះ World Cup ឆ្នាំ ២០២២ រួចមកហើយក្តី ប៉ុន្តែទម្រង់លេងពួកគេនៅតែល្អមិនធ្លាក់ចុះខ្លាំង។ អេស្ប៉ាញវិញ ក៏កំពុងពង្រឹងសមត្ថភាពកីឡាករ ត្រៀមខ្លួនប្រជែងពានពិភពលោកជាថ្មីដូចគ្នាដែរ៕
ប្រភព៖ THMEYTHMEY
