ក្រុមកីឡាបាល់ទាត់ជម្រើសជាតិព័រទុយហ្កាល់អាយុក្រោម ១៧ឆ្នាំ ក្លាយជាជើងឯកពិភពលោក FIFA U-17 World Cup ឆ្នាំ ២០២៥ លើកដំបូងក្នុងប្រវត្តិសាស្ត្រ តាមរយៈការយកឈ្នះអូទ្រីស ១-០ នៅវគ្គផ្តាច់ព្រ័ត្រ នៅទឹកដីកាតា។ ជាការប្រកួតបង្កើនចំនួនក្រុមរហូតដល់ ៤៨ក្រុម ស្រដៀងទៅនឹងព្រឹត្តិការណ៍ធំ World Cup ឆ្នាំ២០២៦ ក្រុមអាយុក្រោម ១៧ឆ្នាំ មកពីអឺរ៉ុប ៣ក្រុម កាន់តំណែងកំពូលទាំង ៣ (Top 3) ឆ្នាំនេះ។
ជ័យជម្នះរបស់ព័រទុយហ្កាល់ ទទួលបានមកពីការស៊ុតបាល់បញ្ចូលទីពីខ្សែប្រយុទ្ធ Anisio Cabral មកពីក្លិប SL Benfica បន្ទាប់ពីគេទទួលបានការបញ្ជូនបាល់យ៉ាងល្អពីមិត្តរួមក្រុម នៅនាទី៣២ នៃវគ្គទី១។
គ្រាប់ជួយក្រុមលើកពាននោះ ក៏ជាគ្រាប់ទី៧ ប្រចាំព្រឹត្តិការណ៍ សម្រាប់ខ្សែប្រយុទ្ធវ័យក្មេង Cabral ផងដែរ ប៉ុន្តែ ពានរង្វាន់បាល់មាស សម្រាប់អ្នកស៊ុតបាល់ចូលទីច្រើនជាងគេ បានលើកីឡាករ Johannes Moser របស់អូទ្រីស ដោយគេរកបាន ៨គ្រាប់។
ពានរង្វាន់ពិភពលោកនេះ គឺជាពានរង្វាន់លើកដំបូងក្នុងប្រវត្តិសាស្ត្រសម្រាប់ក្រុម U17 ព័រទុយហ្កាល់ ដែល ដណ្តើមបាន ហើយស្ថិតក្នុងព្រឹត្តិការណ៍ U17 World Cup លើកទី២០ និងចំពេល FIFA បង្កើនចំនួនក្រុមដល់ ៤៨ក្រុម លើកដំបូងដូចគ្នាថែមទៀត។ FIFA ក៏បានកែប្រែការប្រកួតពានរង្វាន់សម្រាប់យុវជនថ្នាលមួយនេះ ពីរយៈពេល ៤ឆ្នាំ ឱ្យមកនៅត្រឹម ២ឆ្នាំម្តង។
ដោយឡែកការប្រកួតមុនពេលរកឃើញក្រុមជើងឯកនេះ ក្រុម U17 អ៊ីតាលី បានផ្តួលប្រេស៊ីលក្នុងលទ្ធផល ៤-២ នៅក្នុងវគ្គទាត់បាល់កាត់សេចក្តី ១១ម៉ែត្រ បន្ទាប់ពីការប្រកួតរយៈពេល ៩០នាទី បញ្ចប់ទៅត្រឹមលទ្ធផលស្មើ ០-០។ អ៊ីតាលី ជាក្រុមមកពីអឺរ៉ុបកាន់តំណែងលេខ ៣។
ចំណែកកាលពីវគ្គពាក់កណ្តាលផ្តាច់ព្រ័ត្រអ៊ីតាលី ត្រូវបានអូទ្រីសទម្លាក់ចេញពីការប្រកួត នៅក្នុងលទ្ធផល ២-០។ រីឯ ព័រទុយហ្កាល់ ឈ្នះប្រេស៊ីល នៅក្នុងវគ្គទាត់បាល់កាត់សេចក្តី ១១ម៉ែត្រ ៦-៥ ក្រោយការប្រកួតស្មើ ០-០។
គូសបញ្ជាក់ថា សម្រាប់ការប្រកួតពានរង្វាន់ FIFA U17 World Cup ក្រុមនីហ្សេរីយ៉ា ជាក្រុមដណ្តើមបានជើងឯក ច្រើនជាងគេ រហូតដល់ទៅ ៥លើក ចំពោះពានរង្វាន់ដែលបង្កើតឡើងតាំងពីឆ្នាំ ១៩៨៥ មួយនេះ។ ប្រេស៊ីល ជា ក្រុមធ្លាប់គ្រងជើងឯក ៤លើក, ម៉ិកស៊ិក ២លើក, ហ្កាណា ២លើក, សូវៀត អារ៉ាប៊ីសាអូឌីត បារាំង ស្វ៊ីស អង់គ្លេស អាល្លឺម៉ង់ និងព័រទុយហ្កាល់ ឈ្នះម្នាក់ ១លើកដូចគ្នា។ ប្រទេសកាតាទៀតសោត នឹងធ្វើជាម្ចាស់ផ្ទះការប្រកួត រហូតដល់ឆ្នាំ ២០២៩ តែម្តង៕
ប្រភព៖ THMEYTHMEY
