ថៃ សាងប្រវត្តិសាស្ត្របាល់ទាត់អន់បំផុតនៅស៊ីហ្គេម ដោយរបូតមេដាយមាសគ្រប់វិញ្ញាសា

ព្រឹត្តិការណ៍កីឡាស៊ីហ្គេមលើកទី៣៣ ដែលពោរពេញទៅដោយរឿងអាស្រូវ ភាពចម្រូងចម្រាស កំហុសបច្ចេកទេស ​ភាពលម្អៀងលើអត្តពលិកម្ចាស់ផ្ទះ នៅក្នុងប្រទេសថៃ បានបិទបញ្ចប់កាលពីថ្ងៃទី២០ ខែធ្នូ។ ពិធីបើកការប្រកួតផ្លូវការ រៀបចំខ្វះមុខខ្វះក្រោយ ចំណែកពិធីបិទវិញ មានសភាពស្ងប់ស្ងាត់ និងសោះកក្រោះ។

កាលពីថ្ងៃបើកការប្រកួតវិញ្ញាសាបាល់ទាត់បុរស ក្រុមជម្រើសជាតិវៀតណាម ឡាវ ត្រូវច្រៀងភ្លេងជាតិដោយខ្លួនឯង ព្រោះតែបញ្ហាបច្ចេកទេសសំឡេងនៅក្នុងកីឡដ្ឋាន Rajamangala។ បញ្ហានោះថៃ សុំទោសវៀតណាម ជាថ្មី ក៏ដូចជាសហព័ន្ធបាល់ទាត់ឡាវ។ លើសពីនេះ អ្នករៀបចំថៃ នៅតែបន្តកំហុសបច្ចេកទេស ជារឿយៗលើរូបភាពទង់ជាតិ នៅពេលផ្សាយផ្ទាល់ការប្រកួតម្តងៗ។

វិញ្ញាសាបាល់ទាត់ក្នុងសាលបុរស ថៃរបូតមេដាយមាសដោយចាញ់ឥណ្ឌូណេស៊ី ក្នុងកីឡដ្ឋាន ​Nonthaburi ជាពេលដែលធ្វើឱ្យថៃជួបរឿងអាម៉ាស់ធំក្នុងប្រវត្តិសាស្ត្របាល់ទាត់ខ្លួន ដោយរបូតមេដាយមាសដល់ទៅ ៤ ក្នុងប្រភេទកីឡាបាល់ទាត់នេះ។

បាល់ទាត់ក្នុងសាលថៃជាក្រុមខ្លាំងកាលពីវគ្គចែកពូល បានផ្តួលម៉ាឡេស៊ី មីយ៉ាន់ម៉ា និងវៀតណាម និងឥណ្ឌូណេស៊ី។ ប៉ុន្តែនៅវគ្គផ្តាច់ព្រ័ត្រក្រុមម្ចាស់ផ្ទះបែរជាចាញ់ក្រុមឥណ្ឌូណេស៊ី ដែលជាក្រុមនៅលេខ ២ កាលពីវគ្គចែកពូល ទៅវិញ ហើយត្រូវបានគូប្រកួតលត់ក្នុងលទ្ធផលចាស់ដៃ ៦​-១ ដណ្តើមយកបានមេដាយមាស។

បាល់ទាត់ក្នុងសាលនារី ថៃ ត្រូវបានឥណ្ឌូណេស៊ីទម្លាក់នៅក្នុងវគ្គពាក់កណ្តាលផ្តាច់ព្រ័ត្រ​​ ជាមួយលទ្ធផលដ៏ខកចិត្ត ដោយចាញ់ការទាត់បាល់កាត់សេចក្តី លទ្ធផល ៧-៦ ក្រោយការប្រកួតស្មើ ៤-៤។ ក្រុមបាល់ទាត់ក្នុងសាលនារីឥណ្ឌូណេស៊ី ឡើងជួបក្រុមនារីវៀតណាម ប៉ុន្តែពួកគេបែរជាចាញ់នៅវគ្គផ្តាច់ព្រ័ត្រនោះ ហើយថៃ ដណ្តើមបានត្រឹមមេដាយសំរិទ្ធ។

ចំណែកបាល់ទាត់បុរសវគ្គផ្តាច់ព្រ័ត្រក្នុងកីឡដ្ឋាន ​Rajamanga ក្រុមម្ចាស់ផ្ទះថៃ មានឱកាសបើកការនាំមុខមុន ដល់ ២-០ ទល់វៀតណាម ប៉ុន្តែភាពរីករាយនោះកើតមានមិនបានប៉ុន្មាន ក៏ត្រូវក្រុមវៀតណាម វាយបកយកឈ្នះ​​ក្នុងលទ្ធផល ៣-២ វិញ។ វៀតណាមត្រឡប់ដណ្តើមបានមេដាយមាសឡើងវិញ និងធ្វើឱ្យថៃ ចាញ់វគ្គផ្តាច់ព្រ័ត្រក្នុងស៊ីហ្គេម ៣លើកជាប់គ្នា។