កូនប្រុសលោក សាន់ សៅយ៉ាន់ គឺកីឡាករ សៅយ៉ាន់ វិសាល សមត្ថភាពកាន់តែល្អឡើងហើយបន្ទាប់ពីរូបគេប្រកួតឈ្នះមេដាយមាសជូនក្រសួងការពារជាតិ ក្នុងព្រឹត្តិការណ៍ជ្រើសរើសជើងឯកថ្នាក់ជាតិប្រចាំឆ្នាំ២០២៥ ដែលទើបបញ្ចប់កាលពីយប់មិញនៅឯក្រុងតាខ្មៅ ខេត្តកណ្ដាល។
នេះបើតាមការឲ្យដឹងពីលោក សាន់ សៅយ៉ាន់ កូនប្រុសរបស់លោកយប់មិញនេះបានឈ្នះពិន្ទុដៃគូក្នុងវគ្គផ្ដាច់ព្រ័ត្រដណ្ដើមបានមេដាយមាសជូនក្រសួងការពារជាតិក្នុងព្រឹត្តិការណ៍ប្រកួតជ្រើសជើងឯកថ្នាក់ជាតិដែលទើបបញ្ចប់នេះ។
គ្រូបង្វឹកមកពីខេត្តបន្ទាយមានជ័យរូបនេះបន្ថែមទៀតថា កូនរបស់លោកបន្ទាប់ពីឈ្នះមេដាយនៅប៉ារែន និងការឈ្នះខ្សែក្រវាត់នៅសង្វៀនថោនជាមួយ ធន់ បុរី រួចមកមានការកើនឡើងសមត្ថភាព និងអភិវឌ្ឍន៍ខ្លួនកាន់តែល្អឡើងៗ។ កាលពីមុនកូនរបស់លោកមិនសូវចេញបានអាវុធច្រើនទេ ដូចជាកែង និងមិនសូវហ៊ានប្ដូរនោះឡើយ ពោលរៀងខ្លាចៗបន្តិច។ ណាមួយកូនរបស់លោកនៅក្មេង និងមិនបានហ្វឹកហាត់ជាប់ផងដោយសាររវល់រៀនសូត្រ។
ការប្រកួតអំឡុងជើងឯកថ្នាក់ជាតិនេះ វិសាល ធ្វើបានល្អចេញអាវុធបានច្រើន កែង ជង្គង់ និងហ៊ានប្ដូរមុខជាដើម។ មួយវិញទៀតការចេញអាវុធឥលូវក៏ធ្ងន់ល្អទៀតផង ដូចបានឃើញនៅការប្រកួតឯសង្វៀន TV5 បានធ្វើឲ្យដៃគូបាក់ដៃផងដែរ។
បញ្ជាក់ដែរថា កីឡាករ សៅយ៉ាន់ វិសាល កាលពីយប់ថ្ងៃទី៥ ខែកុម្ភៈ ឆ្នាំ២០២៦ យប់ម្សិលមិញនេះរូបគេបានប្រកួតឈ្នះពិន្ទុលើកីឡាករ ឆាយ វណ្ណី ទទួលបានមេដាយមាស។ រូបគេប្រកួតលើប្រភេទទម្ងន់ ៥៧គីឡូក្រាម និងឈ្នះ៣ប្រកួតទើបទទួលបានមេដាយមាសនេះជូនក្រសួងការពារជាតិ៕
ប្រភព៖ KAMPUCHEATHMEY
