ក្លិប Chelsea ពោរពេញសុទ្ធតែកីឡាករវ័យក្មេង មានសមត្ថភាពលេចធ្លោខ្លាំង បង្ហាញប្រព័ន្ធលេងសហការគ្នាយ៉ាងល្អ ក្នុងការផ្តួលគូប្រកួត West Ham United លទ្ធផល ៥-១ ជំនួបសប្តាហ៍ទី២ ក្របខណ្ឌ Premier League។ Chelsea ក្លិបម្ចាស់ពាន Club World Cup ឆ្នាំ ២០២៥ យកឈ្នះការប្រកួត ទោះគ្មានវត្តមានកីឡាករសំខានៗ ក្នុងនោះរួមមាន Cole Palmer ជួបបញ្ហារបួស។
Chelsea ដណ្តើមបាន ៣ពិន្ទុ ពីទឹកដីកីឡដ្ឋាន London និងស៊ុតបញ្ចូលទីបានដល់ទៅ ៥គ្រាប់ ផ្តួលក្រុមម្ចាស់ផ្ទះ។ គ្រាប់បាល់ទាំង ៥នោះ ស៊ុតបានតាមត្រឡប់មកវិញ ពីសំណាក់កីឡាករវ័យក្មេង Joao Pedro នៅនាទី១៥, Pedro Neto នៅនាទី២៣, Enzo Fernandez ធ្វើបាននៅនាទី ៣៤, Moises Caicedo នៅនាទី៥៤ វគ្គទីពិរ និង Trevoh Chalobah គ្រាប់ចុងក្រោយ នាទី៥៨ ក្រោយពេលកីឡាករ Lucas Paqueta របស់ West Ham United រកបានគ្រាប់បើកឆាកតាំងពីនាទី៦។
អវត្តមានរបស់ Palmer កីឡាករសំខាន់ប្រចាំក្រុមពេលកន្លងមក ព្រោះតែនៅមុនការប្រកួតមកដល់ គេបានជួបបញ្ហារបួសសាច់ដុំ អំឡុងពេលហ្វឹកហាត់ ប៉ុន្តែមិត្តរួមក្រុមរបស់គេដទៃពុំមានភាពភ័យខ្លាចក្នុងការប្រកួតឡើយ។
ក្រោយពីបញ្ចប់ការប្រកួត អ្នកវិភាគកីឡាករប្រចាំទូរទស្សន៍ Sky Sports លោក Jamie Redknapp សរសើរក្រុមកីឡាករ Chelsea ថាសុទ្ធសឹងតែបំពេញភារកិច្ចតាមតួនាទីបានយ៉ាងល្អដូចៗគ្នា ទោះគ្មានវត្តមានរបស់កីឡាករសំខាន់ដូចជា Cole Palmer។
ក្រុមរហស្សនាមតោខៀវ អាចរកបាន ៣ពិន្ទុដំបូង ប្រចាំរដូវកាលថ្មី នៅត្រឹមសប្តាហ៍ទី២ នៃក្របខណ្ឌ Premier League បន្ទាប់ពីពួកគេប្រកួតបើកឆាកក្នុងទឹកដីកីឡដ្ឋាន Stamford Bridge ត្រឹមលទ្ធផលស្មើ ០-០ ទល់នឹងក្រុម Crystal Palace។
គួររំលឹកថា តោខៀវ Chelsea ជាក្រុមគ្រងជើងឯកពានរង្វាន់ FIFA Club World Cup ឆ្នាំ ២០២៥ ដែលទើបបញ្ចប់កាលពីខែកក្កដា ក្រោយក្រុមមកពីអង់គ្លេសបានយកឈ្នះ Paris Saint Germain នៅវគ្គផ្តាច់ព្រ័ត្រលើទឹកដីអាម៉េរិកក្នុងលទ្ធផល ៣-០។ Chelsea ជាក្រុមតែគត់ដែលសហព័ន្ធបាល់ទាត់អន្តរជាតិ (FIFA) ផ្តល់នាមជាក្រុមជើងឯកពិភពលោកទីមួយ ហើយពេលអបអរការលើកពានក្រុមមួយនេះ ក៏ត្រូវបានលោក ដូណាល់ ត្រាំ ប្រធានាធិបតីអាម៉េរិក ចូលរួមប្រគល់ពានដោយផ្ទាល់ដៃផងដែរ៕
ប្រភព៖ THMEYTHMEY
