លោក Aleksander Ceferin ប្រធានសហព័ន្ធបាល់ទាត់អឺរ៉ុប (UEFA) និងលោក David Terrier ប្រធានសហព័ន្ធកីឡាករបាល់ទាត់អាជីព (FIFPRO) រួមគ្នាអំពាវនាវឱ្យក្រុមបាល់ទាត់ជម្រើសជាតិ និងក្លិបក្នុងតំបន់អឺរ៉ុប គិតគូរពីកត្តាសុខុមាលភាពកីឡាករ។ ស្ថាប័នទាំងពីរ ព្រមានថាកាលវិភាគប្រកួតមមាញឹកខ្លាំងពេក នឹងផ្តល់ហានិភ័យខ្ពស់ដល់កីឡាករ។
ជំនួបរវាងលោក Ceferin និង Terrier បានធ្វើឡើងកាលពីសប្តាហ៍មុន ក្នុងប្រទេសអាល់បានី ហើយមេស្ថាប័នទាំងពីរ ក៏បានរួមគ្នាអំពាវនាវដល់ស្ថាប័ន UEFA ផ្ទាល់ ស្ថាប័នលីគកំពូលនានា ជម្រើសជាតិ និងសហភាពដៃគូក្នុងបាល់ទាត់ រួមគ្នាធ្វើការងារក្នុងការការពារសុខុមាលភាពកីឡាករ។
សេចក្តីថ្លែងការណ៍រួមរបស់មេ UEFA និង FIFPRO ធ្វើឡើង ក្រោយពេលលោក Hansi Flick អ្នកចាត់ការក្រុម Barcelona រិះគន់ក្រុមជម្រើសជាតិអេស្ប៉ាញ ប្រើប្រាស់ Lamine Yamal ទាំងកំពុងមានរបួស។ បើតាមសម្តីរបស់លោក Flick កីឡាករវ័យ១៨ឆ្នាំ ត្រូវបានក្រុមគ្រូពេទ្យជម្រើសជាតិផ្តល់ថ្នាំបំបាត់ការឈឺចាប់ ហើយដាក់គេចូលលេងវគ្គជម្រុះ World Cup 2026 ទ្វីបអឺរ៉ុប។
ក្លិប Paris Saint Germain ក្នុងខែកញ្ញា ក៏បានរិះគន់ខ្លាំងទៅកាន់ក្រុមគ្រូពេទ្យរបស់ជម្រើសជាតិបារាំង ដែលមិនស្តាប់យោបល់របស់ក្លិប ចំពោះបញ្ហាប្រឈមនឹងរបួស លើខ្សែប្រយុទ្ធ Ousmane Dembele និង Desire Doue ពេលពួកគេចូលលេងវគ្គជម្រុះ World Cup 2026 ទ្វីបអឺរ៉ុប។ ខ្សែប្រយុទ្ធបារាំងទាំង ២ បានវិលត្រឡប់ចូលរួមក្លិប PSG វិញភ្លាម រួចក៏ជួបបញ្ហារបួស។
ស្ថាប័នកីឡាករអាជីពបារាំង (UNFP) បានស្តីបន្ទោសបញ្ហារបួសលើកីឡាករ ព្រោះតែកាលវិភាគការប្រកួតអន្តរជាតិច្រើនលើសលុប បង្កហានិភ័យដល់សុខភាពកីឡាករ។
លោក Ceferin បានលើកឡើងដូច្នេះថា៖«ការរួបរួមរបស់យើងជាមួយ FIFPRO ទ្វីបអឺរ៉ុប ឆ្លុះបញ្ចាំងពីទំនួលខុសត្រូវរួមក្នុងការការពារសុខុមាលភាពកីឡាករ និងពង្រឹងមូលដ្ឋានគ្រឹះកម្រិតការប្រកួត។ ស្របពេលតម្រូវការកីឡាករមានការកើនឡើង វាពិតជាសំខាន់ខ្លាំង ទាមទារឱ្យយើងធ្វើការរួមគ្នា ជាមួយបាល់ទាត់ជាតិនីមួយៗ លីគបាល់ទាត់ ក្លិប និងកីឡាករ ដើម្បីស្វែងរកដំណោះស្រាយកណ្តាលណាមួយដើម្បីអនាគតនៃកីឡា។»។
ចំណែកមេ FIFPRO វិញ ទទួលស្គាល់ថាកាលវិភាគប្រកួតមានភាពមាមាញឹកខ្លាំង ឈានដល់កម្រិតហានិភ័យ ហើយស្ថាប័នគ្រប់គ្រងកីឡាករអាជីពអឺរ៉ុប នឹងសហការជាមួយស្ថាប័នលីគ ក្លិប ក្រុមជម្រើសជាតិ និង UEFA ដើម្បីការពារសុខុមាលភាពកីឡាករ៕
ប្រភព៖ THMEYTHMEY
