នៅរដូវកាល ២០២៥-២០២៦ នេះ ក្លិបបាល់ទាត់ ព្រះខ័នរាជស្វាយរៀង កំពុងតែបង្ហាញសក្តានុពលដ៏ខ្លាំងក្លា អំពីប្រព័ន្ធលេងរបស់ខ្លួន ពោលតាំងពីតំបន់អ្នកចាំទី ការពារ រហូតដល់តំបន់ប្រយុទ្ធ។
ការប្រកួតក្នុងលីគកំពូល កម្ពុជា Cambodian Premier League រដូវកាលនេះ ក្រុម ព្រះខ័នរាជស្វាយរៀង មិនទាន់ស្គាល់រស់ជាតិបរាជ័យនៅឡើយទេ ដោយឆ្លងកាត់ ៥ ប្រកួត ឈ្នះទាំង ៥ ប្រកួត និងកំពុងកាន់កាប់តំណែងកំពូលតារាងក្នុងលីគ។ ខណៈការប្រកួតចុងក្រោយកាលពីល្ងាចថ្ងៃ សុក្រ ទី ១៩ ខែ កញ្ញា ឆ្នាំ ២០២៥ ម្សិលមិញ ពួកគេទើបតែបន្តទទួលជ័យជម្នះលើក្រុម ឡាយហ្វ ព្រះសីហនុ នៅពហុកីឡដ្ឋានជាតិ មរតកតេជោ ក្នុងលទ្ធផល ៦ ទល់នឹង ១។
ដោយឡែកការប្រកួតផ្សេងៗទៀត ដូចជាពានបើករដូវកាល Cambodian Super Cup និងការប្រកួតពានក្លិបតំបន់ អាស៊ាន ASEAN Club Championship Shopee Cup រដូវកាលនេះ ក៏ក្រុមមានមូលដ្ឋាននៅខេត្ត ស្វាយរៀង មួយនេះ មិនទាន់ចាញ់នៅឡើយដែរ។
រឿងគួរឱ្យចាប់អារម្មណ៍បន្ថែមទៀត គឺកីឡាករបរទេស ២ រូប ដែលព្រះខ័នរាជស្វាយរៀង បាននាំចូលនៅរដូវកាលនេះ រួមមាន Patrick Robson និង Kwame Peprah កំពុងតែបង្ហាញសមត្ថភាពល្អខ្លាំង គួរឱ្យកត់សម្គាល់។ បច្ចុប្បន្ន Patrick កំពុងឈរជាកីឡាកររកបានគ្រាប់បាល់ច្រើនជាងគេក្នុងលីគ ពោលគឺចំនួន ៦ គ្រាប់ ដោយឈរនៅលើកីឡាករ Eduardo Junior របស់ អង្គរថាយហ្គើរ និង Kwame ដែលរកបាន ៥ គ្រាប់ដូចគ្នា។
គួរឱ្យដឹងថា ការប្រកួតបន្ទាប់ ក្រុមព្រះខ័នរាជស្វាយរៀង នឹងត្រូវជួបជាមួយក្រុមខ្លាំង វៀតណាម Nam Dinh FC ក្នុងពាន Shopee Cup នៅថ្ងៃទី ២៥ ខែ កញ្ញា។ លុះរំលងតែ ៣ ថ្ងៃ ពួកគេនឹងត្រូវបន្តបេកកម្មក្នុងលីគកំពូល កម្ពុជា បន្តទៀត ដោយត្រូវជួបជាមួយក្រុម ភ្នំពេញក្រោន នៅថ្ងៃទី ២៨ ខែ កញ្ញា ឆ្នាំ ២០២៥៕
ប្រភព៖ KAMPUCHEATHMEY
