សហព័ន្ធខ្មែរកីឡាហែលទឹកបានបញ្ជូនគ្រូបង្វឹក កីឡាករ កីឡាការិនី សរុប ៣នាក់ទៅចូលរួមការប្រកួតនៅឯប្រទេសវៀតណាម រយៈពេល ៣ថ្ងៃចាប៉ពីថ្ងៃទី១០ ដល់ ១៣ ខែតុលា ឆ្នាំ២០២៥ នៅឯទីក្រុងហាណូយ។
លោក ហែមថុន ពន្លឺ ដែលជាគ្រូបង្វឹក និងជាអ្នកដឹកនាំកីឡាករ កីឡាការិនីចេញទៅនេះបានឲ្យដឹងថា ឥលូវនេះគឺបានទៅដល់ទីក្រុងហាណូយ ប្រទេសវៀតណាមហើយ និងត្រៀមខ្លួនសម្រាប់ចូលរួមប្រកួតនៅថ្ងៃស្អែកនេះ។
កីឡាការិនី កាំង មុយនីន លេងលើ ៤វិញ្ញាសា 50AP, 100BF, 200BF, 400BF ចំណែកកីឡាករ ទួន ទិត្យសត្យា គឺលេងលើ ៤វិញ្ញសាដូចគ្នាគឺ 50AP, 50SF, 100SF, 200SF។ ពួកគេនឹងចាប់ផ្ដើមប្រកួតពីថ្ងៃស្អែករហូតទៅហើយ។
គ្រូបង្វឹកខាងលើបន្តទៀតថា នេះជាការប្រកួតជាផ្លូវការថ្នាក់ជាតិរបស់ប្រទេសវៀតណាម។ ជាមួយគ្នានេះដែរម្ចាស់ផ្ទះវៀតណាមបានអញ្ជើញខាងកម្ពុជាឲ្យចូលរួមការប្រកួតនេះផងដែរ ប៉ុន្តែមិនមែនជាការដណ្ដើមមេដាយអ្វីនោះទេ។ ការប្រកួតនេះគឺមានសារសំខាន់ចំពោះអ្នកទាំងពីរបានវាស់ស្ទង់សមត្ថភាពដែលខ្លួនបានហ្វឹកហាត់កន្លងទៅថាមានភាពរីកចម្រើនដល់កម្រិតណា។ បន្ថែមពីនេះជាឱកាសបានប្រៀបធៀបសមត្ថភាពរបស់ខ្លួនជាមួយខាងវៀតណាមថាមានកម្រិតបច្ចេកទេស ខុសប្លែក ឬរីកចម្រើនជាងគេយ៉ាងណាខ្លះដែរ។
នេះជាការប្រកួតដែលអាចដក់បទពិសោធផង និងជាត្រៀមខ្លួនរបស់អ្នកទាំងពីរសម្រាប់ឆ្ពោះទៅចូលរួមការប្រកួតហែលទឹកពាក់ជើងទាអាស៊ីអាគ្នេយ៍ នៅខែវិច្ឆិកា ឆ្នាំ២០២៥ ដែលគេគ្រោងធ្វើនៅប្រទេសឥណ្ឌូណេស៊ីនៅពេលខាងមុខនេះ។
បញ្ជាក់ដែរថា គ្រូបង្វឹក កីឡាករ កីឡាការិនីដែលទៅចូលរួមប្រកួតក្នុងកម្មវិធី Vietnam National Swimming and Fin Swimming Championships នៅឯប្រទេសវៀតណាមនេះដឹកនាំដោយលោក ហែមថុន ពន្លឺ និងមានកីឡាករ ទួន ទិត្យសត្យា កីឡាការិនី កាំង មុយនីន។ ការប្រកួតនេះធ្វើឡើងនៅទីក្រុងហាណូយ ប្រទេសវៀតណាម ចាប់ពីថ្ងៃទី១០ ដល់ ១៣ ខែតុលា ២០២៥៕
ប្រភព៖ KAMPUCHEATHMEY
