អ្នកលេងគុនខ្មែរដើមកំណើតពីខេត្តព្រៃវែង លន បញ្ញា ថាខ្លួននឹងមានការប្រកួតធំៗចំនួនពីរគឺការប្រកួតនៅឯប្រទេសកូរ៉េ និងការប្រកួតដណ្ដើមខ្សែក្រវាត់ X Treme Cambodia នៅឯសង្វៀនហង្សមាសនៅពេលខាងមុខ។
កីឡាករ លន បញ្ញា បានលើកឡើងក្នុងហ្វេសបុកផេករបស់ខ្លួនថា ឥលូវនេះមិនបានសម្រាកទៅណាទេគឺហ្វឹកហាត់ត្រៀមការប្រកួតចំនួនពីរធំៗនាពេលខាងមុខនេះ។ នៅដើមខែវិច្ឆិកា ឆ្នាំ២០២៥ នេះរូបគេរួមទាំងកីឡាករគុនខ្មែរមួយចំនួនទៀតនឹងចេញទៅប្រកួតនៅឯប្រទេសកូរ៉េ។ ចំណែកការប្រកួតមួយទៀតនោះគឺជាការប្រកួតដណ្ដើមខ្សែក្រវាត់ X Treme Cambodia នៅសង្វៀនហង្សមាស។
អ្នកប្រដាល់រូបនេះបន្ថែមទៀតថា ដូចដឹងស្រាប់ហើយនៅហង្សមាសតែងតែនាំយកជើងខ្លាំងៗមក ដូច្នេះហើយរូបគេអាចនឹងជួបកីឡាករលំដាប់ផងដែរ។ យ៉ាងណាការប្រកួតនៅហង្សមាសនេះរូបគេមិនបានបញ្ជាក់ថាថ្ងៃខែណានៅឡើយទេ។
បញ្ជាក់ដែរថា លន បញ្ញា ជាជើងខ្លាំងលំដាប់ទម្ងន់ ៦៧គីឡូក្រាមនៅកម្ពុជា និងកំពុងមានកេរ្តិ៍ឈ្មោះល្បីកម្រចាញ់។ អ្នកប្រដាល់រូបនេះជាកូនសិស្សលោក ធន់ សុភា នៃក្លឹបប្រដាល់ធន់សុភាគុនខ្មែរ៕
ប្រភព៖ KAMPUCHEATHMEY
