កីឡាកររត់ប្រណាំងជម្រើសជាតិកម្ពុជា ២ រូប បានឈ្នះមេដាយប្រាក់ដូចគ្នាពីការចូលរួមប្រកួតក្នុងព្រឹត្តិការណ៍រត់ម៉ារ៉ាតុងអន្តរជាតិ នៅប្រទេសវៀតណាម កាលពីថ្ងៃអាទិត្យ ទី១២ ខែតុលា ឆ្នាំ ២០២៥។
វិញ្ញាសាពាក់កណ្តាលម៉ារ៉ាតុង ២១គីឡូម៉ែត្រ កីឡាករជម្រើសជាតិកម្ពុជាកូនកាត់ខ្មែរ-បារាំង Lai Terence ទទួលបានចំណាត់ថ្នាក់លេខ២ ដោយប្រើ ថិរវេលា ១ម៉ោង ១៤នាទី និង ០៤វិនាទី តាមពីក្រោយម្ចាស់មេដាយមាសជាកីឡាករម្ចាស់ផ្ទះវៀតណាម Pham Phan ដែលប្រើ ថិរវេលា ១ម៉ោង ១៣នាទី និង ៣៧វិនាទី ហើយមេដាយសំរិទ្ធបានទៅកីឡាករកេនយ៉ា Kimutai Hillary ដែលប្រើថិរវេលា ១ម៉ោង ១៥នាទី និង ៤៥វិនាទី។
សម្រាប់វិញ្ញាសាម៉ារ៉ាតុងពេញ ៤២គីឡូម៉ែត្រ កីឡាករ វ៉ាន់ ភារ៉ា ទទួលបានចំណាត់ថ្នាក់លេខ ២ បន្ទាប់ពីប្រើថិរវេលា ២ម៉ោង ៣៨នាទី និង ៤២នាទី តាមពីលក្រោយម្ចាស់មេដាយមាសត្រឹមតែជាង ៦នាទី ប៉ុណ្ណោះពីកីឡាករវៀតណាម Huynh Anh Khoi ដែលប្រើថិរវេលា ២ម៉ោង ៣២នាទី និង ១៨វិនាទី ហើយមេដាយសំរិទ្ធបានទៅកីឡាករម្ចាស់ផ្ទះវៀតណាម Le Van Tuan ដែលប្រើ ថិរវេលា ២ម៉ោង ៤២នាទី និង១៣វិនាទី។
វិញ្ញាសាចម្ងាយ ២១គីឡូម៉ែត្រ (ពាក់កណ្តាលម៉ារ៉ាតុង Half Marathon)
- លេខ១៖ កីឡាករ Pham Phan (វៀតណាម) មេដាយមាស ដោយប្រើថិរវេលា ១ ម៉ោង ១៣ នាទី និង ៣៧ វិនាទី
- លេខ២៖ កីឡាករ Lai Terence (កម្ពុជា) មេដាយប្រាក់ ដោយប្រើ ថិរវេលា ១ ម៉ោង ១៤ នាទី និង ០៤វិនាទី
- លេខ៣៖ កីឡាករ Kimutai Hillary Kipchumba (កេនយ៉ា) មេដាយសំរិទ្ធ ដោយប្រើ ថិរវេលា ១ ម៉ោង ១៥ នាទី និង ៤៥ វិនាទី
វិញ្ញាសាចម្ងាយ ៤២គីឡូម៉ែត្រ (ម៉ារ៉ាតុងពេញ Full Marathon)
- លេខ១៖ កីឡាករ Huynh Anh Khoi (វៀតណាម) មេដាយមាស ដោយប្រើថិរវេលា ២ម៉ោង ៣២នាទី និង ១៨វិនាទី
- លេខ២៖ កីឡាករ វ៉ាន់ ភារ៉ា (កម្ពុជា) មេដាយប្រាក់ ដោយប្រើថិរវេលា ២ម៉ោង ៣៨នាទី និង ៤២នាទី
- លេខ៣៖ កីឡាករ Le Van Tuan (វៀតណាម) មេដាយសំរិទ្ធ ដោយប្រើ ថិរវេលា ២ម៉ោង ៤២នាទី និង ១៣វិនាទី
កីឡាករ កីឡាការិនីរត់ប្រណាំងកម្ពុជា ៧ នាក់បានទៅប្រកួតនៅប្រទេសវៀតណាម កាលពីថ្ងៃអាទិត្យ ទី១២ ខែតុលានេះគឺ កីឡាករ វ៉ាន់ ភារ៉ា រត់ចម្ងាយ ៤២គីឡូម៉ែត្រ កីឡាការិនី កាន់ ស្រីរ័ត្ន រត់ចម្ងាយ ៤២គីឡូម៉ែត្រ កីឡាករ ឧក រ៉ហ៊ីត រត់ចម្ងាយ ២១គីឡូម៉ែត្រ កីឡាករកូនខ្មែរ-បារាំង Lai Terence រត់ចម្ងាយ ២១គីឡូម៉ែត្រ កីឡាករ ស៊ន ពិសី រត់ចម្ងាយ ១០គីឡូម៉ែត្រ កីឡាការិនី រុំ រំដួល រត់ចម្ងាយ ៥គីឡូម៉ែត្រ និង កីឡាករ ឆន សុផាន រត់ចម្ងាយ ៥គីឡូម៉ែត្រ៕
ប្រភព៖ KAMPUCHEATHMEY
