កំពូលខ្សែប្រយុទ្ធ Cristiano Ronaldo រកបានគ្រាប់បាល់ទី ៨០០ ជាគ្រាប់បាល់ផ្លូវការប្រចាំ ក្លិបអាជីព និងក្លាយជាកីឡាករដំបូងគេបង្អស់ ដែលអាចរកបានកំណត់ត្រានេះ ក្នុង ប្រវត្តិសាស្ត្របាល់ទាត់សម័យទំនើប។ កំណត់ត្រាទទួលបាននេះ កើតចេញពីការរួម ចំណែកស៊ុតបាល់ ១គ្រាប់ របស់កីឡាករវ័យ ៤០ឆ្នាំ ក្នុងការប្រកួតដែលក្រុម Al Nassr ផ្តួលក្រុម Al Fateh លទ្ធផល ៥-១ ថ្ងៃទី១៩ ខែតុលា។
ខ្សែប្រយុទ្ធវ័យចំណាស់ បន្តស្វែងរកបានគ្រាប់បាល់ ទោះមានជាពេលវេលានៃអាជីពរបស់គេ កំពុងកាន់តែខិតជិតដល់ផ្លូវបញ្ចប់ទៅហើយ។ ទោះបីជាក្នុងការប្រកួតនោះ គេស៊ុតបាល់ពិន័យ ១១ម៉ែត្របញ្ចូលទីមិនបានសម្រេច តែការព្យាយាមជាថ្មី តាមរយៈការស៊ុតពីចម្ងាយ នៅទី៦០ បានជួយឱ្យបុរសវ័យ ៤០ឆ្នាំ រកបានគ្រាប់បាល់ទី ៨០០ ក្នុងអាជីព។ ចំណែក ៤គ្រាប់ ផ្សេងទៀតធ្វើបានដោយកីឡាករ Joao Felix ៣គ្រាប់ម្នាក់ឯង នៅនាទី១៣, ៦៨ និង ៨០ រីឯ ១គ្រាប់ ផ្សេងទៀតធ្វើបានដោយកីឡាករ Kingsley Coman នាទី៧៥។
គ្រាប់បាល់ដ៏អស្ចារ្យ ពីសំណាក់ប្រធានក្រុមព័រទុយហ្កាល់ បានជួយឱ្យគេក្លាយជាកីឡាករដំបូងគេក្នុងប្រវត្តិសាស្ត្រ ដែលអាចរកបាន ៨០០គ្រាប់ ប្រចាំក្លិបអាជីព។ គ្រាប់ទាំង៨០០នោះ រកបាននៅក្លិប Sporting Cp, Manchester United, Real Madrid, Juventus និងក្លិបបច្ចុប្បន្ន Al Nassr។ លើសពីនេះ Ronaldo ក៏បានទាញក្រុម Al Nassr ឱ្យឈរលើកំពូលតារាងលីគកំពូលអារ៉ាប៊ីសាអូឌីត ដោយកាន់ចំនួន ១៥ពិន្ទុក្នុងដៃ ពីការប្រកួតចំនួន ៥លើក បើករដូវកាលថ្មី។
ទោះមានវ័យ ៤០ឆ្នាំ ក៏ដោយក្តី កីឡាករម្ចាស់ពាន Ballon d’Or ៥សម័យ នៅតែជាកីឡាករមានឥទ្ធិពលបំផុតក្នុងក្រុម Al Nassr និងក្នុងនាមជាកីឡាករម្នាក់ដើរតួសំខាន់ជំរុញទឹកចិត្ត កីឡាករដទៃក្នុងក្រុមទាំងមូល។ មិនត្រឹមតែប៉ុណ្ណោះ ការបន្តរកបានគ្រាប់បាល់នោះ ក៏បានបង្ហាញអំពីសមត្ថភាពដ៏អស្ចារ្យ។ ពិសេស បុរសសញ្ជាតិព័រទុយហ្កាល់ ថារូបគេនៅតែអាចធ្វើបានយ៉ាងល្អ ក្នុងការរកគ្រាប់បាល់ នៅការប្រកួតដែលមានកម្រិតខ្ពស់។
គ្រាប់បាល់ទាំង ៨០០គ្រាប់ នៅក្លិបអាជីពទាំងអស់ ដែលអតីតកីឡាករក្រុម Real Madrid រកបាន ដោយផ្តើមដំបូងនៅក្លិប Sporting Cp ចំនួន ៥គ្រាប់ ជាកន្លែងគេផ្តើមអាជីពដំបូងបង្អស់។ ពេលផ្លាស់ទៅក្លិប Manchester United ចំនួន ២លើក Ronaldo រកបានចំនួន ១៤៥ គ្រាប់ ហើយគ្រាប់បាល់ច្រើនជាងគេ គឺកើតឡើងនៅក្លិប Real Madrid ចំនួន ៤៥០គ្រាប់។ ទៅលេងនៅអ៊ីតាលី ២ឆ្នាំ Ronaldo រកបាន ១០១គ្រាប់ និងបច្ចុប្បន្ននៅក្លិប Al Nassr ក្នុងទ្វីបអាស៊ី កីឡាករម្ចាស់ពាន UEFA Champions League រកបានចំនួន ៩៩គ្រាប់ ពីការបង្ហាញខ្លួន ១១២ប្រកួត ក្នុងការប្រកួតផ្លូវការ៕
ប្រភព៖ THMEYTHMEY
