ក្លិបធំបំផុតរបស់ប្រទេសម៉ាឡេស៊ី Johor Darul Ta’zim បានឡើងវគ្គផ្តាច់ព្រ័ត្រ ពានរង្វាន់ Malaysia FA Cup បន្ទាប់ពីបានយកឈ្នះក្រុម Kuching City ដោយលទ្ធផលទាំងពីរជើង ៤-១ ក្នុងវគ្គពាក់កណ្តាលផ្តាច់ព្រ័ត្រ។
នៅជើងទី១ ពួកគេបានយកឈ្នះលើក្រុម Kuching City ដោយលទ្ធផល ២-១ កាលពីថ្ងៃទី៩ ខែវិច្ឆិកា និងជើងទី២បានឈ្នះ ២-០ កាលពីថ្ងៃទី៣០ ខែវិច្ឆិកា ដើម្បីបានឡើងទៅកាន់វគ្គផ្តាច់ព្រ័ត្រ។ បើក្រឡេកមើលពីវគ្គ១៦ក្រុមចុងក្រោយមក ពួកគេបានឈ្នះក្រុម UM-Damanara United ទាំងពីរជើង ១០-៣ និងឈ្នះក្រុម Penang ទាំងពីរជើង ៥-១ នៅវគ្គ៨ក្រុមចុងក្រោយ។
នៅវគ្គផ្តាច់ព្រ័ត្រ Johor Darul Ta’zim ត្រូវជួបក្រុម Sabeh នៅថ្ងៃទី១៤ ខែធ្នូ ឆ្នាំ ២០២៥។ ពួកគេធ្លាប់បានឈ្នះពានរង្វាន់នេះចំនួន ៤ លើកហើយគឺឆ្នាំ ២០១៦ ២០២២ ២០២៣ និង ២០២៤-២៥។
ការប្រកួតជាមួយក្រុម Kuching City កាលពីថ្ងៃទី៣០ ខែវិច្ឆិកា គឺជាការប្រកួតចុងក្រោយ មុនពេលធ្វើដំណើរមកប្រទេសកម្ពុជាដើម្បីប្រកួតជាមួយព្រះខ័នរាជស្វាយរៀង នៅថ្ងៃទី៤ ខែធ្នូ ឆ្នាំ ២០២៥ នៅពហុកីឡដ្ឋានជាតិមរតកតេជោ ក្នុងពានរង្វាន់ ASEAN Club Championship។
ឆ្លងកាត់ ២ ប្រកួតក្នុងពានរង្វាន់ ASEAN Club Championship ក្រុម Johor Darul Ta’zim កំពុងឈរលើកំពូលតារាងពូល B បន្ទាប់ពីបានយកឈ្នះ Lion City Sailors ៣-១ និងឈ្នះ Bangkok United ៤-០ ខណៈ ព្រះខ័នរាជស្វាយរៀង ឈរលេខ ២ ពីការឈ្នះ Shan United ៣-០ និងចាញ់ Nam Dinh ១-២។
ការជួបគ្នារវាង ព្រះខ័នរាជស្វាយរៀង និង Johor Darul Ta’zim គួរឲ្យចាប់អារម្មណ៍សម្រាប់អ្នកគាំទ្រកម្ពុជា។ ព្រះខ័នរាជស្វាយរៀង ជាក្រុមជោគជ័យ និងកំពុងឡើងខ្លាំងនៅកម្ពុជានាពេលបច្ចុប្បន្ន។ ចំណែក Johor Darul Ta’zim ជោគជ័យបំផុតនៅម៉ាឡេស៊ី ហើយពួកគេជាក្រុមលេងកម្រិតទី១ប្រចាំទ្វីបអាស៊ី។
ការធ្វើដំណើរមកប្រកួតនៅកម្ពុជាគឺជាលើកទី២សម្រាប់ក្រុម Johor Darul Ta’zim បន្ទាប់ពីលើកទី១ធ្លាប់ប្រកួតឈ្នះបឹងកេត នៅពហុកីឡដ្ឋានជាតិអូឡាំពិក៕
ប្រភព៖ KAMPUCHEATHMEY
