លោក អាំង សិរីពិសិដ្ឋ ថាការវិលត្រឡប់មកវិញរបស់កីឡាករ សួន ចាន់ណារ៉ូ ក៏មិនទាន់ប្រាកដថាអាចលេងនៅស៊ីហ្គេម ចុងឆ្នាំនេះនោះទេរង់ចាំមើលការហ្វឹកហាត់ល្អដល់កម្រិតណាសិន។
អនុប្រធានសហព័ន្ធកីឡាបាល់ទះកម្ពុជា លោក អាំង សិរីពិសិដ្ឋ បានឲ្យដឹងថា ចំពោះកីឡាករឆ្នើម សួន ចាន់ណារ៉ូ មកវិញនេះក៏មិនទាន់ប្រាកដថារូបគេបានលេងនៅស៊ីហ្គេម លើកទី៣៣ ចុងឆ្នាំនេះ ១០០% នោះទេគឺរង់ចាំមើលការហ្វឹកហាត់របស់គេល្អប្រសើរដល់កម្រិតណាសិន។ មិនមែនតែ ណារ៉ូ នោះទេពោលកីឡាករទាំងអស់មិនទាន់ដឹងថានរណានឹងជាប់បានទៅលេងនោះដែរ ពោលរង់ចាំមើលការហ្វឹកហាត់ និងសមត្ថភាពលេចធ្លោកម្រិតណារហូតត្រូវជ្រើសរើស និងចេញបញ្ជីឈ្មោះផ្លូវការសិន។
ចំណែកកីឡាករ សួន ចាន់ណារ៉ូ ក៏បានឲ្យដឹងថាដែរថា បច្ចុប្បន្ននេះរូបគេទើបតែចូលហាត់នៅក្លឹបបាល់ទះវិសាខានោះទេ មិនទាន់ចូលជំរំជម្រើសជាតិជាផ្លូវការនោះឡើយទេ។ ទាល់តែហ្វឹកហាត់បានល្អប្រសិនទើបអាចចូលជាមួយក្រុមជម្រើសជាតិវិញបាន។
បញ្ជាក់ដែរថា បន្ទាប់ពីការចាកចេញពីជម្រើសជាតិបាល់ទះជិតមួយឆ្នាំមកនេះកីឡាករ សួន ចាន់ណារ៉ូ ត្រូវបានសហព័ន្ធហៅមកវិញហើយដើម្បីជួយដល់ក្រុមត្រៀមការប្រកួតសំខាន់ៗនៅពេលខាងមុខដូចជាស៊ីហ្គេមចុងឆ្នាំ២០២៥។ ប៉ុន្តែសហព័ន្ធកំពុងតាមដានមើលសមត្ថភាពរបស់គេផងដែរនៅល្អដូចមុន ឬយ៉ាងណា៕
ប្រភព៖ KAMPUCHEATHMEY
