ពលរដ្ឋភៀសសឹក ចូលរួមកម្មវិធី «រត់ដើម្បីសន្តិភាព» ដើម្បីភ្ជាប់មិត្តភាព និងលើកកម្ពស់សុខុមាលភាព

បើតាមការចុះផ្សាយរបស់ មន្ទីរព័ត៌មានខេត្តព្រះវិហារ កម្មវិធីរត់កម្សាន្តនោះមាន ចម្ងាយ ៥គីឡូម៉េត្រ សម្រាប់ពលរដ្ឋជនភៀសសឹក កំពុងស្នាក់នៅមណ្ឌលសុវត្ថិភាព វត្តពោធិ៍ ៥០០០ដើម ជាគំនិតផ្តួចផ្តើមឡើងរបស់ លោក គីម រិទ្ធី អភិបាលខេត្តព្រះវិហារផ្ទាល់។ 

តាមរូបភាពបានបង្ហោះនោះ ពលរដ្ឋភៀងសឹកចំនួន ៧១១​នាក់ ស្រី ៣២៣នាក់ មានទាំងក្មេងចាស់ ខ្លះរត់ ខ្លះដើរ ក្នុងបរិវេណមណ្ឌលសុវត្ថិភាព រត់លាយស្នាមញញឹម និងភាពរីករាយ ខ្លះទៀតឈរអមសងខាងផ្លូវបង្ហាញការសាទរលើកទឹកចិត្ត។​

រត់កម្សាន្ត ៥គីឡូម៉ែត្រ នាព្រឹកព្រលឹមនោះ អ្នកចូលរួមរត់ជាជនភៀសសឹក ទទួលអារម្មណ៍ធូរស្រាល​ ហើយរត់ដោយភ្ជាប់បំណង «រត់ដើម្បីសន្តិភាព កម្ពុជាត្រូវការសន្តិភាព»។ កម្មវិធី «រត់ដើម្បីសន្តិភាព» នោះមិនត្រឹមតែដើម្បីភ្ជាប់មិត្តភាពចំណោមជនភៀសសឹក និងលើកកម្ពស់សុខភាពនោះទេ ប៉ុន្តែក៏បង្ហាញអំពីបំណងទាមទាររកសន្តិភាពពិតប្រាកដ ទៅកាន់ពិភពលោកឱ្យបានដឹងឮ ក្រោយកម្ពុជារងការឈ្លានពានពីសំណាក់កងទ័ពប្រទេសជិតខាង។

កម្មវិធីរត់ខាងលើ រៀបចំឡើងចំនួន​ ២ថ្ងៃ ពោលនៅព្រឹកថ្ងៃទី២៣ និងថ្ងៃទី២៤ ខែសីហា។ ថ្ងៃទីមួយនៃកម្មវិធីគឺជាការរត់ជម្រុះស្វែងរកពលរដ្ឋ រត់បានល្អជាងគេចំនួន បុរស ១០០នាក់ និងស្រី ១០០នាក់ ដើម្បីបន្តទៅរត់នៅថ្ងៃទី២៤ សីហា ស្វែងរកជ័យលាភ័ អ្នករត់ល្អបំផុតប្រចាំកម្មវិធីពីចំណាត់ថ្នាក់លេខ ១​-១០​ សរុបចំនួន ២០នាក់(ស្រី ១០នាក់)។

កាលពីព្រឹកថ្ងៃទី២៤ រហូតថ្ងៃ២៨ខែកក្កដា យោធាថៃបានបើកការវាយប្រហារយ៉ាងកម្រោលមកលើទឹកកម្ពុជា។ ក្នុងប្រតិបត្តិការឈ្លានពានទឹកដីក្នុងរយៈពេល៥ថ្ងៃ យោធាថៃបានប្រើសព្វាវុធធុនធ្ងន់ និងសាហាវមកលើកម្ពុជា។ ក្នុងនោះ កងទ័ពថៃបានប្រើយន្តហោះចម្បាំង F-16   គ្រាប់បែកចង្កោម ផ្សែងពុល ដ្រូនពិឃាត គ្រាប់បែក MK-84 MK-82…ជាដើម ដែលបង្កឱ្យមានជនស៊ីវិលស្លូតត្រង់ស្លាប់-របួសជាច្រើននាក់។ ការវាយប្រហារយ៉ាងកម្រោលរបស់យោធានេះបានបង្ខំឱ្យប្រជាពលរាប់សិបម៉ឺននាក់ចាកចេញពីភូមិឋានរបស់ខ្លួន។

ដ្បិត បច្ចុប្បន្នមានបទឈប់បាញ់រវាងកម្ពុជា-ថៃ​ ដែលមានភាគីប្រទេសម៉ាឡេស៊ី ប្រធានអាស៊ាន សហរដ្ឋអាម៉េរិក និងចិន ជាធ្វើសាក្សីក្តី ក៏ប៉ុន្តែកម្ពុជា​គឺនៅរងការឈ្លានពាន និងការគំរាមកំហែងពីសំណាក់យោធាថៃ​។ ការគំរាមកំហែងជារឿយៗទាំងនោះ បន្តធ្វើឱ្យពលរដ្ឋកម្ពុជា រស់នៅក្បែតំបន់ព្រំដែនច្រើនគ្រួសារ មិនអាចវិលត្រឡប់ទៅផ្ទះសម្បែងវិញបាននៅឡើយ។