Kitchee យកជំនួបរវាងភ្នំពេញក្រោន និង East Bengal ដើម្បីទប់ទល់ក្រុមទាំងពីរ

លោក Carreiro Robspierry គ្រូបង្វឹក Kitchee SC លើកឡើងថាការប្រកួតរវាងភ្នំពេញក្រោន និង East Bengal ក្នុងជំនួបដំបូង នៃពូល E មានសារៈសំខាន់ណាស់សម្រាប់ក្រុមរបស់លោក ដើម្បីត្រៀមខ្លួន ព្រោះបានស្វែងយល់ពីទម្រង់ បច្ចេកទេស និងកម្រិតនៃការលេងរបស់គូប្រជែងទាំងពីរ។ លោក Carreiro Robspierry បញ្ជាក់ថារូបលោក មិនមានទិន្ន័យនៃការប្រកួតច្រើនពីភ្នំពេញក្រោនឡើយ ដែលជាហេតុធ្វើឲ្យខ្លួន ពិបាកក្នុងការត្រៀមខ្លួនប្រកួតជាមួយក្រុមកម្ពុជាមួយនេះ។ អ្វី ដែលគ្រូ Kitchee បានស្វែងយល់ពីភ្នំពេញក្រោន គឺវីដេអូប្រកួត នាអំឡុងឆ្នាំ២០២៤។ លោក Robspierry មិនអាចជឿជាក់ទាំងស្រុងលើទិន្ន័យចាស់ឡើយ ព្រោះតែការវិវឌ្ឍនៃទម្រង់លេងរបស់គូប្រកួត មិននៅត្រឹងមួយកន្លែង។ 

«យើង មិនបានលេងនៅប្រកួតដំបូង។ ដូច្នេះ យើងមានឱកាសដឹងពីកម្រិតគូប្រកួត ព្រោះថាជារឿងពិបាកមួយ សម្រាប់យើងក្នុងការទទួលបានព័ត៌មានពីគូប្រកួតទាំង២។ ដូច្នេះ យើងមានឱកាសទស្សនាការប្រកួតរបស់ពួកគេសិន ហើយយើងមានពេល ២ ៣ថ្ងៃទៀត ដើម្បីរៀបចំខ្លួនសម្រាប់បច្ចេកទេសយ៉ាងល្អបំផុត សម្រាប់ការប្រកួតរបស់យើង។ វាមានសារៈសំខាន់ ដែលខ្ញុំអាចមើលឃើញការប្រកួតរបស់ពួកគេ ហើយមើលថាតើពួកគេមានអ្វីខ្លះ ហើយមើលពីទម្រង់របស់ពួកគេ។»។ នេះ បើតាមការប្រាប់របស់គ្រូបង្វឹករូបនេះ ក្នុងសន្និសីទមុនប្រកួត។

កញ្ញា Danielle Anna Maria កីឡាការិនីក្រុម Kitchee ក៏បានលើកឡើងដូចទៅនឹងអ្វី ដែលគ្រូបង្វឹកខ្លួនបាននិយាយ ផងដែរ។

កីឡាការិនីរូបនេះ បាននិយាយថា៖«ខ្ញុំមានអារម្មណ៍ថាខ្ញុំសំណាងល្អ ដែលបានទស្សនាការប្រកួតរបស់ពួកគេហើយស្វែងយល់ពីគូប្រកួតបន្ថែម។ យើងជឿជាក់លើគ្រូបង្វឹក សម្រាប់ការសម្រេចចិត្ត។ យើង ត្រៀមរួចជាសម្រេចការប្រកួត។»។

ដោយឡែក កញ្ញា ម៉ៅ សាវីន ខកចិត្ត ដែលក្រុមភ្នំពេញក្រោន មិនអាចឈ្នះក្រុម East Bengal ព្រោះតែកូនក្រុមមានឱកាសជាច្រើនលើកក្នុងការរកគ្រាប់បាល់ ប៉ុន្ដែបែជាមិនចំគោលដៅ និងមិនមានសំណាង។ 

គ្រូបង្វឹករូបនេះ បាននិយាយក្នុងសន្និសីទសារព័ត៌មានក្រោយបរាជ័យជាមួយ East Bengal ថានឹងជំរុញឲ្យកីឡាការិនីភ្នំពេញក្រោនប្រឹងអស់ពីសមត្ថភាព សម្រាប់ជំនួបទី២។ ដោយឡែកចំពោះលទ្ធផលបែបណា កញ្ញា ម៉ៅ សាវីន មិនបានបានផ្ដោតឡើយ ប៉ុន្ដែគ្រូបង្វឹករូបនេះ ផ្ដោតលើការប្រឹងលេងឲ្យបានល្អរបស់កូនក្រុម ដោយមានស្មារតីក្រុម និងឆន្ទៈប្រកួតប្រជែង៕

ប្រភព៖ THMEYTHMEY