សៀមរាប៖ ជាលើកដំបូងបើគិតចាប់តាំងពីឆ្នាំ២០១៤ មក កាន់ ស្រីរ័ត្ន ក្លាយជាកីឡាការិនីដំបូងបំផុតរបស់កម្ពុជា ដែលបានឈ្នះជើងឯកលើវិញ្ញាសារត់ប្រណាំងម៉ារ៉ាតុងអន្តរជាតិចក្រភពអង្គរ (Angkor Empire Marathon) លើកទី១០ ខណៈ វ៉ាន់ ភារ៉ា ក៏ជាកីឡាករទីមួយផងដែរ ដែលបានឈ្នះជើងឯកពីរឆ្នាំជាប់គ្នា លើចម្ងាយ៤២.១៩៥គីឡូម៉ែត្រ។
ជាមួយនឹងថិរវេលា ០៣:២២:០៩ កាន់ ស្រីរ័ត្ន នៃក្រុមអត្តពលកម្មជម្រើសជាតិ បានជាកីឡាការិនីកម្ពុជាដំបូងបំផុតដែលទទួលបានចំណាត់ថ្នាក់លេខ១ លើវិញ្ញាសាម៉ារ៉ាតុងចម្ងាយ៤២.១៩៥គីឡូម៉ែត្រ ក្នុងព្រឹត្តិការណ៍ Angkor Empire Marathon លើកទី១០ កាលពីថ្ងៃទី៣១ ខែសីហា នៅរមណីយដ្ឋានអង្គរ ខេត្តសៀមរាប។
សម្រាប់ស្រីរ័ត្ន វាជាការប្រកួតម៉ារ៉ាតុងផ្លូវការលើកដំបូងបំផុតរបស់ខ្លួន ដោយកីឡាការិនីជម្រើសជាតិរូបនេះ ជាម្ចាស់កំណត់ត្រាថ្នាក់ជាតិលើចម្ងាយពាក់កណ្តាលម៉ារ៉ាតុង (២១.០៩៧៥គីឡូម៉ែត្រ) ក្នុងថិរវេលា ១:២៤:៤០។
ព្រឹត្តិការណ៍នៅលើទឹកដីអង្គរនេះ ក៏ជាកំណត់ត្រាថ្មីផងដែរសម្រាប់កម្ពុជា ដោយមានកីឡាការិនីក្នុងស្រុកបញ្ចប់ទីនាំមុខគេដល់ទៅពីរនាក់។ អេង មុយងីម ដណ្តើមបានលេខ២ដោយប្រើពេល ០៣:៣៩:៥៤។
លេខ៣ បានទៅលើកីឡាការិនីហ្វីលីពីន Arlene Morris Napeek ក្នុងថិរវេលា ០៣:៤២:៥៥។ ទោះបីជាមិនបានបញ្ចប់កំណត់ត្រាក្រោម៤ម៉ោង ប៉ុន្តែកញ្ញា អ៊ូ សុខមាន អ្នកសារព័ត៌មាននៃសារព័ត៌មានឌីជីថលថ្មីៗ ស្ថិតនៅចំណាត់ថ្នាក់លេខ៤ ដែលជាមោទនភាពមួយសម្រាប់ក្រុមការងារ និងសាម៉ីខ្លួនផ្ទាល់ក្នុងនាមជាអ្នករត់មិនមែនអាជីពម្នាក់។
កីឡាការិនីបារាំង Veronique Messina ជាម្ចាស់ជើងឯកនាព្រឹត្តិការណ៍លើកដំបូងនៅឆ្នាំ២០១៤។ ឆ្នាំ២០១៥ បានលើកីឡាការិនីជប៉ុន Sakie Ishibashi ដែលជាម្ចាស់កំណត់ត្រាខ្ពស់ជាងគេក្នុងថិរវេលា ២:៥៩:១២។
ជ័យលាភីជាបន្តបន្ទាប់រួមមាន កីឡាការិនីជប៉ុន Erina Nakai (ឆ្នាំ២០១៦), កីឡាការិនីអេស្ប៉ាញ (ឆ្នាំ២០១៧), កីឡាការិនីអង់គ្លេស Jill Hamill (ឆ្នាំ២០១៨), កីឡាការិនីចិន Shi Hongxia (ឆ្នាំ២០១៩)។
ការប្រកួតត្រូវបានអាក់ខាននៅឆ្នាំ២០២០ និងឆ្នាំ២០២១ ដោយសារតែការរាតត្បាតកូវីដ-១៩។ កីឡាការិនីហុងកុង Elaine Lee បានលេខ១នៅឆ្នាំ២០២២ បន្ទាប់មកកីឡាការិនីវៀតណាម Nguyen Thi Duong នៅឆ្នាំ២០២៣ និង កីឡាការិនីអៀរឡង់ Caitriona Jennings នាឆ្នាំ២០២៤។
ក្រៅពីកាន់ ស្រីរ័ត្ន កីឡាករ វ៉ាន់ ភារ៉ា ក៏សម្រេចបានកំណត់ត្រាពិសេសផ្ទាល់ខ្លួន និងសម្រាប់កម្ពុជាទាំងមូលផងដែរ ដោយជាប់ចំណាត់ថ្នាក់លេខ១ពីរលើកជាប់ៗគ្នា។ ក្នុងព្រឹត្តិការណ៍នេះ វ៉ាន់ ភារ៉ា បានលេខ១ក្នុងថិរវេលា ០២:៤៧:៣០ ដោយនាំមុខកីឡាកររុស្ស៊ី Evgey Bloshenko (០២:៥៩:១២) និងកីឡាករជប៉ុន Yuta Yamaoto (០៣:០៦:១៤)។
កាលពីឆ្នាំ២០២៤ កីឡាករឆ្នើមកម្ពុជារូបនេះ ក៏បានក្លាយជាម្ចាស់ជ័យលាភីលេខ១ផងដែរក្នុងថិរវេលា ០២:៤០:៥២។ កំណត់ត្រាខ្ពស់បំផុតរបស់ ភារ៉ា គឺ ២:៣១:០៨ ដែលសម្រេចបាននៅលើទឹកដីអង្គរដូចគ្នាកាលពីចុងឆ្នាំ២០២៤ ប៉ុន្តែក្នុងព្រឹត្តិការណ៍ Angkor Indochine Marathon លើកទី១។
សម្រាប់ម្ចាស់ជ័យលាភីលេខ១ នៃព្រឹត្តិការណ៍ Angkor Empire Marathon ដោយគិតចាប់ពីឆ្នាំ២០១៤មករួមមាន កីឡាករជប៉ុនដែលមានសញ្ជាតិកម្ពុជា Neko Hiroshi (ឆ្នាំ២០១៤ និងឆ្នាំ២០១៩), កីឡាករជប៉ុន Koki Kawauchi (ឆ្នាំ២០១៥), កីឡាករអូស្ត្រាលី Jeff Chaseling (ឆ្នាំ២០១៦), កីឡាករអង់គ្លេស Neil Burns (ឆ្នាំ២០១៧), កីឡាករកម្ពុជា ម៉ា វីរ៉ូ (ឆ្នាំ២០១៨), កីឡាករកម្ពុជា សម រចនា (ឆ្នាំ២០២២) និងកីឡាករវៀតណាម Nguyen Van Long (ឆ្នាំ២០២៣)។
Angkor Wat Empire Marathon ឆ្នាំ២០២៥ នេះ មានការកាត់បន្ថយចំនួនកីឡាករបរទេសមួយចំនួន ដោយសារតែការលើកពេលប្រកួតពីថ្ងៃទី៣ មកថ្ងៃទី៣១ ខែសីហា។ ការលើកពេលនេះ គឺដោយសារតែពេលវេលាស្ថិតក្នុងកាលៈទេសៈដែលព្រំដែនកម្ពុជារងការឈ្លានពានពីក្រុមយោធាថៃ។
ព្រឹត្តិការណ៍ដែលចេញពីមុខបរិវេណប្រាសាទអង្គរវត្ត បេតិកភណ្ឌពិភពលោកកាលពីថ្ងៃទី៣១ ខែសីហា មានអ្នកចូលរួមជាង ៤ ០០០នាក់ ក្នុងនោះជនបរទេស៧៦២នាក់ លើវិញ្ញាសា៣គីឡូម៉ែត្រ ១០គីឡូម៉ែត្រ ២១គីឡូម៉ែត្រ និង៤២គីឡូម៉ែត្រ។
ចំពោះវិញ្ញាសាពាក់កណ្តាលម៉ារ៉ាតុង កីឡាករ អ៊ុក រ៉ហ៊ីត បានលេខ១ ដោយនាំមុខកីឡាករ សុខ ឌីម៉ង់ និងចន សុផាន់។ កីឡាការិនី Kukiko Kurokawa បានលេខ១ផ្នែកនារី ដោយនាំមុខកីឡាការិនី Cheryl Yuen Ting Ng និងកីឡាការិនីកម្ពុជា San Puthsotheavy។
សម្រាប់វិញ្ញាសា១០គីឡូម៉ែត្រ លេខ១បានលើកីឡាករខ្មែរ-បារាំង ឡៃ ធារិន, លេខ២ កីឡាករ សន ពិសី និងលេខ៣ កីឡាករ ខន សិង្ហា។ រុន រំដួល បានលេខ១ផ្នែកនារី ដោយនាំមុខ បូ សំណាង និង ថាច់ ធីឌឿក។
វិញ្ញាសាពាក់កណ្តាលម៉ារ៉ាតុង និងម៉ារ៉ាតុង ក៏មានការផ្តល់ជ័យលាភីសម្រាប់ប្រភេទអាយុផងដែរពោលពីចន្លោះ ៤៥ឆ្នាំដល់៥៥ឆ្នាំ និងចាប់ពី៥៦ឆ្នាំឡើង ផងដែរ៕
ប្រភព៖ THMEYTHMEY
