អ្នកលេងគុនខ្មែរ ស៊ន រ៉ាគីម ថារូបគេបុកហ្វឹកហាត់ខ្លាំងប្រហែល ៣សប្ដាហ៍ហើយដើម្បីត្រៀមលក្ខណៈឲ្យបានល្អគ្រប់គ្រាន់វិលមកកាន់ការប្រកួតស្អែកនេះក្រោយសម្រាកព្យាបាលរបួសជើងអស់រយៈពេល ៩ខែមកនេះ។
កីឡាករ ស៊ន រ៉ាគីម បានឲ្យដឹងមកថា ចំពោះបញ្ហារបួសកន្លងទៅនោះគឺបានជាសះស្បើយ និងបានហ្វឹកហាត់ខ្លាំងដូចដើមវិញហើយ។ ការហ្វឹកហាត់ទាត់ធ្ងន់ៗ និងស្នៀតវាយដៃគឺខ្លួនបានសាកល្បងរួចរាល់ហើយមិនមានអ្វីជាបញ្ហានោះឡើយ ប៉ុន្តែក៏រងចាំមើលការប្រកួតជាក់ស្ដែងលើសង្វៀនសិន។
អ្នកប្រដាល់ដើមកំណើតពីខេត្តបាត់ដំបងរូបនេះបន្ថែមទៀតថា រូបគេនឹងខំប្រឹងប្រែងប្រកួតឲ្យបានល្អជូនអ្នកគាំទ្រ។ ដោយសារខ្លួនអាក់ខានឡើងសង្វៀនជិត១ឆ្នាំមកហើយ ដូច្នេះបើការប្រកួតនេះល្អ ឬមិនល្អដល់កម្រិតណានោះសូមប្រិយមិត្តកុំប្រកាន់។
បញ្ជាក់ដែរថា កីឡាករ ស៊ន រ៉ាគីម បាត់មុខពីសង្វៀនគុនខ្មែរប្រហែល ៩ខែមកហើយដោយសារបួសដៃ និងរបួសជើង។ នៅថ្ងៃទី១២ ខែកញ្ញា ឆ្នាំ២០២៥ ស្អែកនេះរូបគេនឹងត្រូវប្រកួតមិត្តភាពអន្តរជាតិជាមួយកីឡាករឡាវនៅសង្វៀនថោន ចាប់ពីម៉ោង ៧យប់តទៅ៕
ប្រភព៖ KAMPUCHEATHMEY
