លោក Christopher Grant អ្នកគ្រប់គ្រងទូទៅនៃក្លិបបាល់ទាត់ ព្រះខ័នរាជស្វាយរៀង ជាវាគ្មិនម្នាក់ក្នុងវេទិកាបាល់ទាត់ពិភពលោក (World Football Summit) ឆ្នាំ ២០២៥ នៅទីក្រុងហុងកុង កាលពីសប្តាហ៍មុន ដែលមានអ្នកជំនាញបាល់ទាត់ និងវីរបុរសបាល់ទាត់ជាច្រើនមកពីទូទាំងពិភពលោកចូលរួម។
ក្នុងនាមជាវាគ្មិនម្នាក់ ស្ថិតនៅលើវេទិកាពោរពេញដោយកិត្តិយស លោក Christopher Grant បានលើកបង្ហាញ ព្រះខ័នរាជស្វាយរៀង ដែលបានធ្វើ និងកំពុងធ្វើនាពេលបច្ចុប្បន្ន។ ជាពិសេសសមិទ្ធផលទទួលបាននាប៉ុន្មានឆ្នាំចុងក្រោយ។ ចំណុចសំខាន់ៗដែលលោកបានបង្ហាញគឺទី១. ការអភិវឌ្ឍក្លិប ព្រះខ័នរាជស្វាយរៀង, ទី២ ការកសាងកីឡដ្ឋាន, ទី៣ ការបណ្តុះបណ្តាលថ្នាលយុវជនកម្រិតអាជីព, ទី៤ ជោគជ័យរបស់ក្លិបឈានដល់វគ្គផ្តាច់ព្រ័ត្រអន្តរជាតិ និងទី៥ សារសំខាន់ដែលបានចូលរួមជាមួយ វេទិកាបាល់ទាត់ពិភពលោក។
លោកបានរៀបរាប់ថា ៖«ជាវាគ្មិនម្នាក់ ខ្ញុំបានបង្ហាញពីការរអភិវឌ្ឍរបស់ក្លិបព្រះខ័នរាជស្វាយរៀង ការកសាងកីឡដ្ឋាន ការបណ្តុះបណ្តាលថ្នាលយុវជន ជោគជ័យដែលយើងទទួលបានទាំងក្នុងស្រុក និងអន្តរជាតិ AFC ហើយផែនការយុទ្ធសាស្ត្រស្ថិតនៅពីក្រោយនៃជោគជ័យរបស់យើង»។
អ្នកគ្រប់គ្រងទូទៅបានបញ្ជាក់ថា ៖«ការចូលរួមជាមួយវេទិកាបាល់ទាត់ពិភពលោកនេះ ពិតជាសំខាន់ណាស់។ យើងទទួលបានអ្វីថ្មីៗពីបាល់ទាត់ទូទាំងពិភពលោក ជាពិសេសយើងបានបង្ហាញឲ្យពិភពលោកស្គាល់ យល់ពីក្លិបរបស់យើង និងពីបាល់ទាត់កម្ពុជា»។
វេទិកាបាល់ទាត់ពិភពលោក World Football Summit ដែលរៀបចំនៅទីក្រុងហុងកុងនេះមានអ្នកជំនាញបាល់ទាត់ និងថ្នាក់ដឹកនាំជាច្រើនមកពីសហព័ន្ធកម្រិតតំបន់ និងពិភពលោក ព្រមទាំងតំណាងក្លិបជាច្រើន៕
ប្រភព៖ KAMPUCHEATHMEY
