កំពូលអ្នកចាត់ការក្រុមកម្រិតពិភពលោក ១០រូប ប្រចាំឆ្នាំ២០២៥

ក្រុមខ្លាំងៗរួមមាន Real Madrid, Bayer Leverkusen, Manchester City, Liverpool និង នៅក្រុមជម្រើសជាតិជាដើមដូចជាប្រេស៊ីល ដែលមានកីឡាករល្អៗកម្រិតខ្ពស់ ​បញ្ចេញ សមត្ថភាពក្នុងការប្រកួតខ្លាំង តែមនុស្សម្នាក់ដ៏សំខាន់ពីក្រោយខ្នងកីឡាករទាំងនោះ គឺ គ្រូបង្វឹកដែលផ្តល់យុទ្ធសាស្ត្រ និងការរៀបចំប្រព័ន្ធលេងរបស់ក្រុម។

ឆ្នាំ២០២៥ ភាគច្រើនអ្នកចាត់ការវ័យក្មេងជាច្រើន បានលេចសមត្ថភាពកើនឡើងខ្លាំង ខណៈអ្នកចាត់ចាស់ៗខ្លាំងពីជំនាន់ដើម ហាក់បីធ្លាក់ចុះខ្សោយលើប្រព័ន្ធលេង ខុសពីគ្រូ បង្វឹកសម័យបច្ចុប្បន្ន មានបច្ចេកទេសខ្ពស់ និងរបៀបលេងតាមបច្ចេកវិទ្យាទំនើប នៃបាល់ ទាត់ កំពុងវិវឌ្ឍន៍ទៅមុខយ៉ាងខ្លាំង។

ស្របពេលមានការប្រកួតប្រជែងដ៏ខ្លាំងក្លា នារដូវកាលថ្មី ២០២៥-២៦​ ​គ្រូបង្វឹក​តាមក្លិប​នី​មួយ​ៗក៏មានពេលវេលាត្រៀមខ្លួនច្រើនដែរ ដើម្បីបញ្ចេញសមត្ថកិច្ចដឹកនាំក្រុមឱ្យ​បានខ្លាំង និង​ឈានទៅក្លាយជា គ្រូបង្វឹកដែលមានយុទ្ធសាស្ត្រ រៀបចំ​ប្រព័ន្ធលេងខ្លាំងជាងគេ​ប្រចាំ​ពិភពបាល់ទាត់ សម័យបច្ចុប្បន្ន។

អ្នកចាត់ការក្រុមខ្លះទៀត ទទួលបានភាពជោគជ័យក្នុងអាជីពដឹកនាំ​ ដោយការជួយ​ក្រុម​ដណ្តើម​បានពានរង្វាន់តាមលីគកំពូលរៀងៗខ្លួន និងសមិទ្ធផលពានរង្វាន់ឯកត្តជនជាច្រើន​ដែលគ្រូបង្វឹកខ្លួនឯកទទួលបានផង។

ខាងក្រោមនេះជាអ្នកចាត់ការក្រុមកំពូលទាំង ១០ មានកម្រិតសមត្ថភាពខ្ពស់ដឹកនាំ​ក្រុមប្រកួតប្រជែង៖

១. លោក Luis Enrique អ្នកចាត់ការក្រុម Paris Saint Germain

បុរសសញ្ជាតិអេស្ប៉ាញ ជួយក្រុម Paris Saint Germain ឈ្នះពានរង្វាន់ UEFA Champions League លើកដំបូងកាលពីរដូវកាលមុន ហើយថែមទាំងដឹកនាំក្រុមឈ្នះ​ពានរង្វាន់ទាំងអស់ ប្រចាំប្រទេសបារាំង រួមមានទាំងជាជើងឯកលីគកំពូល Ligue 1 ថែម​ទៀត។ លោក Enrique ក៏ធ្លាប់ធ្វើជាគ្រូបង្វឹក Barcelona ជួយឱ្យឈ្នះ UCL, La Liga, Copa del Rey ហើយធ្លាប់ដឹកនាំក្រុមជម្រើសជាតិអេស្ប៉ាញផងដែរ។

២. លោក Pep Guardiola អ្នកចាត់ការក្រុម Manchester City

បុរសសញ្ជាតិអេស្ប៉ាញ ជាបីតាប្រព័ន្ធលេងប៉ះបាល់ខ្លីៗ ឬគេនិយមហៅថា (Tiki Taka) ដ៏​ល្បីក្នុងវិស័យបាល់ទាត់សម័យទំនើប ហើយលោកជួយក្រុមខ្លាំងជាច្រើន​ ឈ្នះពានរង្វាន់​មិនដែលដាច់ រួមមានទាំង Barcelona, Bayern Munich ហើយបច្ចុប្បន្ននៅ Manchester City។ លោក Pep Guardiola ជួយ Man City ដណ្តើមបានពាន UCL លើកដំបូងកាលពី​រដូវកាល ២០២៣-២៤។

៣. លោក Arne Slot អ្នកចាត់ការក្រុម Liverpool

ផ្ទេរចេញពីក្លិបកម្រិតមធ្យម Feyenoord របស់ហូឡង់ លោក Slot មកដឹកនាំក្រុម Liverpool លើក​ដំបូងជួយក្រុមឈ្នះពានរង្វាន់ Premier League កំណត់ត្រាលើកទី២០ ក្នុងប្រវត្តិ​សាស្ត្រ​ក្លិប។ បុរសហូឡង់ ក៏ជួយក្រុមឡើងដល់វគ្គ ១៦ក្រុម UCL រដូវកាលមុន។ អំឡុង​ដឹក​នាំ​ក្រុម Feyenoord នៅហូឡង់ លោក Slot តែងជួយក្រុមប្រជែងឈ្នះពានរង្វាន​លីគ​កំពូល ក្នុងស្រុកជាប់ជានិច្ច។

៤​. Hansi Flick អ្នកចាត់ការ Barcelona

លោក Flick ចូលជួយ Barca ឱ្យវិលរកឃើញកម្រិតល្អបំផុតមួយឡើងវិញ នៅរដូវកាល​ដំបូងរបស់លោក ដោយដឹកនាំក្រុមប្រជែង ឈ្នះ La Liga, Copa Del Rey និង Spanish Super Cup។ មិនតែប៉ុណ្ណោះ លោកបានដឹកនាំក្រុម ឡើងវគ្គពាក់កណ្តាលផ្តាច់ព្រ័ត្រ UCL ថែមទៀត កាល​ពីរដូវកាលមុន និងជារដូវកាលដំបូងរបស់បុរសអាល្លឺម៉ង់។

៥. Simone Inzaghi អ្នកចាត់ការក្រុម Al Hilal

ឆ្នាំ​២០២៥ លោក Simeone អាចត្រូវបានគេចាត់ទុកថា មានកម្រិតលើ Flick, Alonso តាម​រយៈសមិទ្ធផល ដែលលោកធ្លាប់​បានជួយក្រុម Inter Milan ប្រជែងឈ្នះ Barca, Bayer Leverkusen ជាដើម រហូតអាចឡើងដល់វគ្គផ្តាច់ព្រ័ត្រ UCL រដូវកាលមុន។ លោក ​Simeone បានជួយឱ្យ Inter Milan ឈ្នះពាន Serie A រដូវកាលមុន។

៦. លោក Carlo Ancelotti គ្រូបង្វឹកក្រុមជម្រើសជាតិប្រេស៊ីល

ក្រោយចេញពីក្លិប Real Madrid ដោយមិនបានជួយក្រុមឈ្នះពានរង្វាន់អ្វី​សោះ ​កាលពីរដូវ​កាលមុន។ ប៉ុន្តែពេលនេះ លោក Ancelotti បានទៅដឹកនាំក្រុមជម្រើសជាតិប្រេស៊ីល ហើយ​ជាគ្រូបង្វឹកអន្តរជាតិដំបូង ដែលទៅដឹកនាំក្រុមម្ចាស់ពាន World Cup ៥សម័យ។ ត្រឹមវ័យ ៦៦ឆ្នាំ លោក Ancelotti បានដឹកនាំក្រុមធំៗ ឈ្នះពានរង្វាន់លីគកំពូលចំនួន ៤ រួម​មានអ៊ីតាលី អេស្ប៉ាញ អាល្លឺម៉ង់ និងបារាំង ជាពិសេសនោះ លោកឈ្នះ Champions League រហូតដល់ ៥លើក ពេលដឹកនាំ។

៧​. Xabi Alonso អ្នកចាត់ការ Real Madrid

មុនទៅដឹកនាំ Real Madrid បុរសអេស្ប៉ាញ បានបង្កើតប្រវត្តិសាស្ត្រនៅក្លិប Bayer Leverkusen ជួយក្រុមនោះឈ្នះលីគកំពូលអាល្លឺម៉ង់ លើកដំបូងក្នុងប្រវត្តិសាស្រ្ត នៅក្នុង​អាជីពដឹកនាំក្រុមឈុតធំផ្លូវការបានតែ ២ឆ្នាំប៉ុណ្ណោះ។ បច្ចុប្បន្ន Alonso ជួយ Real Madrid ប្រកួតយកឈ្នះជាប់ៗគ្នា មិនទាន់ចាញ់នៅឡើយ។

៨. ​Mikel Arteta អ្នកចាត់ការក្រុម ​Arsenal

ខណៈពេលកំពុងតែជួយកាំភ្លើងធំ ស្វែងការឈ្នះពានរង្វាន់លីគកំពូលអង់គ្លេស លើកដំបូង ក្រោយ​ខកខានរយៈពេល ២០ឆ្នាំ។ បុរសសញ្ជាតិអេស្ប៉ាញរូបនេះ អាចត្រូវបានអ្នកគាំទ្រ​ចាត់​ទុកថា ជាវីរបុរសមួយរូប បើសិនអាចឈ្នះពិតមែន។ ៣រដូវកាលជាប់ៗគ្នា Arsenal តែងតែឈរនៅចំណាត់ថ្នាក់លេខ២ ក្របខណ្ឌ Premier League ក្រោមការដឹកនាំរបស់ លោក Arteta។

៩. Antonio Conte អ្នកចាត់ការក្រុម SSC Napoli

លោក Conte ទៅដល់ក្លិបណា ក្លិបនោះ ​នឹងឈ្នះពានរង្វាន់នៅរដូវកាលដំបូងរបស់លោក​តែម្តង ពិសេសពេលនេះ គឺ Napoli ផ្ទាល់ ដែលខកខានឈ្នះពានយូរឆ្នាំ តែរដូវកាលមុន​ពួក​គេប្រជែងបានពានរង្វាន់ Serie A។ 

១០. Diego Simeone អ្នកចាត់ការក្រុម Atletico Madrid

បុរសសញ្ជាតិអាហ្សង់ទីន ដឹកនាំក្រុម Atletico Madrid ជាង ១០ឆ្នាំ មកហើយ លោកក៏ជា​បុរសម្នាក់ នៅពីក្រោយស្ថិរភាពទម្រង់លេងរបស់ក្រុម​ ឱ្យស្ថិតនៅកម្រិតខ្ពស់​ជាច្រើន​ឆ្នាំ​ជាប់ៗគ្នា។ លោក Simeone ដឹកនាំ Atletico Madrid ឱ្យក្លាយជាបេក្ខភាពប្រជែងពានរង្វាន់​រាល់ឆ្នាំមួយនៅអេស្ប៉ាញ និងនៅ UCL ជាមួយទម្រង់លេងការងារវាយបកដ៏មានប្រសិទ្ធ​ភាព៕

ប្រភព៖ THMEYTHMEY