វគ្គផ្ដាច់ព្រ័ត្រខ្សែក្រវាត់ IPCC រវាងកីឡាករវ័យ ធន់ បុរី និង សៅយ៉ាន់ វិសាល ត្រូវបានលើកពេលហើយដោយសារកូនប្រុសលោក សាន់ សៅយ៉ាន់ ជាប់ប្រកួតតំណាងប្រទេសកម្ពុជានៅព្រឹត្តិការណ៍កីឡាយុវជនអាស៊ី លើកទី៣ នៅឯប្រទេសបារ៉ែន។
បើតាមការបង្ហោះផ្សព្វផ្សាយលើបណ្ដាញសង្គមគឺបានបញ្ជាក់ហើយថាការប្រកួតផ្ដាច់ព្រ័ត្រខ្សែក្រវាត់ IPCC នៅថ្ងៃទី១២ ខែតុលា ឆ្នាំ២០២៥ នៅឯសង្វៀនថោនគឺត្រូវលើកពេលទៅខែវិច្ឆិកាវិញ។ មូលហេតុនោះដោយសារ សៅយ៉ាន់ វិសាល ត្រូវចេញទៅប្រកួតនៅប្រទេសបារ៉ែន ថ្ងៃទី២០ ខែតុលា ប្រកួតតំណាងប្រទេសកម្ពុជា។ ដូច្នេះប្រសិនបើអ្នកប្រដាល់រូបនេះប្រកួតវគ្គផ្ដាច់ព្រ័ត្រ IPCC ថ្ងៃទី១២ តុលា គឺខ្លាចមានរបួសស្នាមណាមួយ ឬជួបបញ្ហាធំដោយចៃដន្យរហូតខកខានការប្រកួតសំខាន់នៅឯប្រទេសបារ៉ែនដែលជាព្រឹត្តិការណ៍ធំប្រចាំទ្វីបអាស៊ី និងធ្វើឡើងរយៈពេល ៤ឆ្នាំម្ដង។
បញ្ជាក់ដែរថា ព្រឹត្តិការណ៍ប្រកួតកីឡាយុវជនអាស៊ីន លើកទី៣ នៅឯប្រទេសបារ៉ែន នេះនឹងចាប់ផ្ដើមពីថ្ងៃទី២២ ដល់ ទី ៣១ ខែតុលា ឆ្នាំ ២០២៥ ដែលមានចំនួន ២៤ប្រភេទកីឡា។ កម្ពុជានឹងបញ្ជូនអត្តពលិកចំនួន ១៥០នាក់ប្រកួតលើ ១៤ប្រភេទកីឡាផ្សេងគ្នា។ ជាមួយគ្នានេះដែរកម្ពុជាក៏នឹងទទួលទង់កីឡាយុវជនអាស៊ីនេះពីប្រទេសបារ៉ែនផងដែរដោយសារតែការប្រកួតលើកទី៤ ឆ្នាំ២០២៩ នឹងត្រូវប្រារព្ធឡើងនៅកម្ពុជា៕
ប្រភព៖ KAMPUCHEATHMEY
