វឌ្ឍនៈ ហ្គោល រីហ្សត ដែលជាទីលានកីឡាវាយកូនហ្គោលស្តង់ដាអន្តរជាតិធំបំផុតនៅកម្ពុជា នឹងរៀបចំព្រឹត្តិការណ៍ប្រកួតកីឡាវាយកូនហ្គោលអន្តរជាតិ«ជើងឯកវឌ្ឍនៈឡេជិន»ដែលប្រជុំដោយវីរបុរសកីឡាករវាយកូនហ្គោល លំដាប់ពិភពលោកឆ្នើមៗមកចូលរួមប្រកួតនៅប្រទេសកម្ពុជា និងមានការផ្សាយតាមប្រព័ន្ធផ្សព្វផ្សាយកីឡាល្បីៗទូទាំងពិភពលោក។
កាលពីរសៀលថ្ងៃសុក្រ ទី១៧ ខែតុលា ឆ្នាំ ២០២៥ អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ និងក្រុមការងារបានធ្វើបទបង្ហាញពីគម្រោងរៀបចំព្រឹត្តិការណ៍ប្រកួតដ៏អស្ចារ្យមិនធ្លាប់មាននៅប្រទេសកម្ពុជាដែលរួមចំណែកដ៏សំខាន់ក្នុងការជំរុញកីឡាវាយកូនហ្គោលកម្ពុជា និងសក្កានុពលនៃទីប្រទេសកម្ពុជា ជាពិសេសវិស័យទេសចរណ៍ទៅកាន់ពិភពលោក។
អ្នកឧកញ៉ា សំអាង វឌ្ឍនៈ មានប្រសាសន៍ថា ៖«កម្ពុជាគឺជាបរទេសដែលឲ្យតម្លៃទៅលើសន្តិភាព និងមិត្តភាព។ យើងស្វាគមន៍អ្នករាល់គ្នាដោយក្តីសោមនស្សរីករាយបំផុត ហើយកម្ពុជាមិនមែនត្រឹមតែជាគោលដៅសម្រាប់កីឡា និងទេសចរណ៍ប៉ុណ្ណោះទេ ប៉ុន្តែកម្ពុជាជាទីកន្លែងដែលតភ្ជាប់វប្បធម៌ រួបរួមសហគមន៍ និងផ្តល់ឲ្យគ្រប់គ្នាមកពីគ្រប់ជាតិសាសន៍មានអារម្មណ៍ដូចជាផ្ទះ»។
ជើងឯកវឌ្ឍនៈឡេជិន នឹងរៀបចំនៅលើទីលានកីឡាវាយកូនហ្គោល វឌ្ឍនៈ ហ្គោល រីហ្សត ចាប់ពីថ្ងៃទី១៧ ដល់ ថ្ងៃទី២៣ ខែវិច្ឆិកា ឆ្នាំ ២០២៥។
- ថ្ងៃចន្ទ អង្គារ៍ ពុធ៖ ការអញ្ជើញមកដល់ និងការហ្វឹកហាត់របស់កីឡាករ
- ថ្ងៃព្រហស្បតិ៍៖ ការប្រកួតប្រូ-អែម ផ្លូវការរវាងភ្ញៀវ និងកីឡាករអាជីព
- ថ្ងៃសុក្រ៖ ការប្រកួតជុំទី១ (សម្រាប់តែកីឡាករអាជីព)
- ថ្ងៃសៅរ៍៖ ការប្រកួតជុំទី២ (សម្រាប់តែកីឡាករអាជីព)
- ថ្ងៃអាទិត្យ៖ ការប្រកួតជុំផ្តាច់ព្រ័ត្រ (សម្រាប់តែកីឡាករអាជីព)
ការប្រកួតវាយចំនួន ៥៤ ហូ ប្រភេទ ស្ត្រូក ផ្លេយ ព្រមទាំងកម្មវិធី ប្រូ-អែម (អាជីពលេងជាមួយអ្នកចូលចិត្ត)។
ប្រភព៖ KAMPUCHEATHMEY
