កីឡាករ Ran Takahashi តារាកីឡាបាល់ទះជប៉ុន ត្រូវចុះផ្សាយថាបាននាំនារី២នាក់ ចូលសណ្ឋាគារក្នុងពេល ២ថ្ងៃ ដោយក្នុងនោះក៏រួមមានទាំងតារាសម្តែងរឿងអាសអាភាសជប៉ុនម្នាក់ផងដែរ។ យ៉ាងណាក៏ដោយ កីឡាករវ័យ ២៤ឆ្នាំ បានចេញមុខបដិសេធថានារីទាំងពីរនាក់នោះជាមិត្តភក្កិប៉ុណ្ណោះ។
Ran ជាកីឡាករបាល់ទះកម្រិតកំពូលមួយរូបក្នុងក្រុមបាល់ទះជម្រើសជាតិជប៉ុន។ តែកាលពីពេលថ្មីៗនេះ កាសែតជប៉ុន Bunshun Online ចុះផ្សាយថា រូបគេមានជាប់ពាន់ព័ន្ធនឹងរឿងអាស្រូវទំនាក់ទំនងស្នេហាជាមួយតារាសម្តែងរឿងអាសអាភាស។ ការចុះផ្សាយនៅថ្ងៃទី២១ តុលា រៀបរាប់ថាកីឡាករវ័យ ២៤ឆ្នាំ បានចំណាយពេល ១យប់គេងនៅសណ្ឋាគារ ជាមួយតារាសម្តែងរឿងកូនជ្រូក ឈ្មោះ Saika Kawakita និងថ្ងៃបន្ទាប់ គេណាត់ជួបតារាស្រីម្នាក់ផ្សេងទៀត។
រឿងនោះកើតឡើងក្រោយពេលកីឡាករ Ran បានចេញពីការប្រកួតមិត្តភាពរវាងជប៉ុន ទល់នឹងប៊ុលហ្ការី តាំងថ្ងៃទី៣ កាលពីខែសីហា មកម្ល៉េះ។
កីឡាករលេងឱ្យក្រុមបាល់ទះ Suntory Sunbirds ត្រូវបានគេប្រទះឃើញចាកចេញពីកន្លែងប្រកួត រួចធ្វើដំណើរទៅកាន់សណ្ឋាគារស្នាក់របស់ក្រុមក្រោយការប្រកួត។ ប៉ុន្តែរូបគេ ក្រោយមកក៏បានចាកចេញទៅស្នាក់នៅកន្លែងផ្សេងទៀត។ ហេតុការណ៍នោះ អ្នកកាសែតបានថតសកម្មភាពរបស់គេដើរចូលទីតាំងហាងអាហារមួយកន្លែង ដោយពាក់មួក និងម៉ាស់បិទមុខជិត។ បន្តិចក្រោយមក មាននារីវ័យក្មេងម្នាក់ទៀត សក់ខ្លីដើរចូលភោជនីយដ្ឋាននោះ រួចពួកគេទាំងពីរ ក៏បានចាកចេញទៅកាន់សណ្ឋាគារមួយកន្លែងស្ថិតក្នុងទីក្រុងតូក្យូ។ កាសែត Bunshun រៀបរាប់ថានារីម្នាក់នាក់នោះ គឺ Kawakita ជាតារាស្រីសម្តែងរឿងអាសអាភាសរបស់ជប៉ុន។
សម្រាប់កីឡាករវ័យ ២៤ឆ្នាំ បច្ចុប្បន្នគេជាកីឡាករស្មាត់វាយក្រៅប្រអប់ (Outside Hitter) មួយរូបប្រចាំក្រុមបាល់ទះជម្រើសជាតិជប៉ុន។ កន្លងមកគេថែមទាំងជាប់ឈ្មោះជាកីឡាករវាយល្អដាច់គេប្រចាំការប្រកួត AVC Men’s Champions League ផងដែរ។ រីឯតារាស្រីមានរឿងអាស្រូវជាមួយគេវិញ នាងមានវ័យ ២៦ឆ្នាំ ដោយបានចូលសម្តែងក្នុងឧស្សាហកម្មរឿងកូនជ្រូកជប៉ុន តាំងពីវ័យ ១៨ឆ្នាំ មកម្ល៉េះ។ នាងមានអ្នកចុចតាមដានលើបណ្តាញសង្គម Instagram ដល់ទៅ ១,៣លាននាក់ និងនៅលើ X អតីត Twitter ចំនួន ១,៦លាននាក់។
កាលពីចុងខែសីហា តារាបាល់ទះវ័យក្មេងរបស់ជប៉ុន ធ្លាប់បានណាត់ជួបតារាសម្តែងស្រី Kawakita ម្តងដែរ នៅបន្ទប់សណ្ឋាគារមួយ។ រឿងភ្ញាក់ផ្អើលជាងនេះទៀតនោះគឺ កីឡាករវ័យ ២៤ឆ្នាំ នៅថ្ងៃដដែល ក្រោយ Kawakita ចាកចេញផុតទៅ រូបគេក៏បានជួបជាមួយនឹងតារាស្រីល្បីលើបណ្តាញសង្គម Instagram ម្នាក់ទៀតឈ្មោះ Uka។ Uka មានអ្នកចុចតាមដានលើ Instagram ចំនួន ១៥០ ០០០នាក់។ បើតាមប្រភពរបស់កាសែត Kbizoom នាង Uka ត្រូវបានគេស្គាល់ថាជាមិត្តស្រីរបស់ Ran។
ទោះជាយ៉ាងណាក្តី ដើម្បីឆ្លើយតបទៅនឹងមតិសាធារណជន ក្រុមហ៊ុនដែលគ្រប់គ្រងលើកីឡាករវ័យ ២៤ឆ្នាំ អះអាងថាខ្លួនមិនជ្រៀតជ្រែកក្នុងផ្លូវជីវិតផ្ទាល់ខ្លួនរបស់អត្តពលិកនោះឡើយ។
ទាក់ទងនឹងរឿងអាស្រូវនេះ តារាបាល់ទះវ័យ ២៤ឆ្នាំ ក៏បានចេញមុខមកបកស្រាយថា តារាស្រី Kawakita ដែលគេបានណាត់ជួបនោះ គឺមានទំនាក់ទំនងត្រឹមជាមិត្តភក្តិនឹងគ្នាតែប៉ុណ្ណោះ។ លើសពីនេះតារាស្រីម្នាក់ទៀតមានឈ្មោះ Uka នោះក៏ជាជាមិត្តភក្តិដូចគ្នាដែរ៕
ប្រភព៖THMEYTHMEY
