លោក Maresca ក្លាយជាគ្រូបង្វឹកនៅ Premier League ដំបូងគេ អស់តំណែងចំថ្ងៃដើមឆ្នាំថ្មី

រឿងរ៉ាវក្លិប Chelsea និងលោក Enzo Maresca នេះ នាំមកនូវភាពស្រឡាំងកាំងសម្រាប់អ្នកគាំទ្របាល់ទាត់ ពិសេសអ្នកគាំទ្រក្លិបតោខៀវផ្ទាល់។ ក្លិបបានប្រកាសចំថ្ងៃដើមឆ្នាំ២០២៦ តែម្តងពីការចែកផ្លូវជាមួយគ្រូបង្វឹក សញ្ជាតិអ៊ីតាលី ទោះបីមានកិច្ចសន្យាជាមួយគ្នារហូតដល់ឆ្នាំ២០២៩ ក៏ដោយ។ 

ការសម្រេចចិត្តរបស់ Chelsea ធ្វើឡើងដោយពុំខ្វល់ខ្វាយខ្លាំងចំពោះសមិទ្ធផល ដែលបុរសអ៊ីតាលី ធ្លាប់ជួយ​​ឱ្យ​​ ក្រុម​ដណ្តើមបានពានរង្វាន់ Club World Cup ឆ្នាំ២០២៥ ដែលរកចំណូលបានរាប់លាន​ដុល្លារនោះឡើយ។

បើតាមការប្រកាសរបស់ក្លិប Chelsea បានបង្ហាញថាថ្នាក់ដឹកនាំកំពូលរបស់ក្លិប ហាក់បាត់ជំនឿលើលោក Maresca ក្នុងតំណែងជាគ្រូបង្វឹក។ នេះក៏ព្រោះតែមើលឃើញពីទម្រង់លេងក្រុមធ្លាក់ចុះខ្លាំង ខុសពីកាលដើមរដូវ កាល។ នៅចំណោម​ ១០ប្រកួតចុងក្រោយ ក្រោមការដឹកនាំរបស់បុរសវ័យ ៤៥ឆ្នាំ Chelsea រកបានជ័យជម្នះ ត្រឹម​ តែ ៣ប្រកួតប៉ុណ្ណោះ និងចាញ់ ៣ប្រកួត ស្មើ ៤ប្រកួត។

បច្ចុប្បន្នឆ្លងកាត់សប្តាហ៍ទី១៩ ក្នុងក្របខណ្ឌ Premier League ក្រុម Chelsea កំពុងឈរនៅកម្រិតលេខ ៥ ដោយរកបាន ៣០ពិន្ទុ និងកំពុងតែប្រជែងកៅអីទៅកាន់ UEFA Champions League រដូវកាលក្រោយ។

ចំណែកបើតាមគេហទំព័រស្ថិតិរបស់ Opta លោក Enzo Maresca បានក្លាយជាគ្រូបង្វឹកដំបូងគេបង្អស់ប្រចាំ Premier League ត្រូវបានដើរចេញពីតំណែង នៅចំថ្ងៃដើមឆ្នាំថ្មី ២០២៦ តែម្តង។

ដោយឡែកបើតាមប្រព័ន្ធផ្សព្វផ្សាយមួយចំនួនប្រចាំអង់គ្លេស បានលើកពីហេតុផលដែល គ្រូបង្វឹកវ័យ ៤៥ឆ្នាំ សម្រេចចិត្តចាកចេញពីក្រុម ព្រោះតែលោកមានបញ្ហាផ្ទៃក្នុងជាមួយនឹងក្រុមការងារគ្រូពេទ្យប្រចាំក្រុមផ្ទាល់តែម្តង។ រឿងនោះធ្វើឱ្យប៉ះពាល់ដល់អារម្មណ៍បុរសអ៊ីតាលី ក្នុងពេលបំពេញការងារ ហើយប៉ះពាល់ដល់ការងារក្នុងក្រុមរបស់លោក។ 

ការចាកចេញរបស់លោក Maresca ពីក្រុមតោខៀវ ដោយលោកទើបដឹកនាំបាន ៩២ប្រកួត ប៉ុណ្ណោះ រាល់ពានរង្វាន់ ទាំងអស់ដែលក្រុមបានប្រជែង។ ចំណោមការប្រកួតទាំងអស់នោះ Chelsea យកឈ្នះការប្រកួត ៥៥លើក ស្មើ ១៦ លើក និងចាញ់ ២១លើក៕

ប្រភព៖ THMEYTHMEY