ក្លិប Lion City Sailors FC បានបញ្ចប់លោក Aleksandar Rankovic ពីតំណែងគ្រូបង្វឹក បន្ទាប់ពីក្រុមនៃលីគកំពូលសិង្ហបុរី (SPL) ចាញ់ព្រះខ័នរាជស្វាយរៀង ២-០ នៅជំនួបវគ្គសន្សំពិន្ទុ Shoppe Cup។
បើតាមការប្រកាសរបស់ក្លិប Sailors នៅថ្ងៃទី៦ ខែកុម្ភៈ បន្ទាប់ពីដឹកនាំបានរយៈពេល ២ ឆ្នាំកន្លះ គ្រូបង្វឹកសញ្ជាតិស៊ែប៊ី Aleksandar Rankovic និង ក្រុម Sailors ត្រូវចែកផ្លូវគ្នាដ៏គួរឲ្យភ្ញាក់ផ្អើល។ គ្រូជំនួយលោក Varo Moreno នឹងទទួលបន្ទុកមើលការខុសត្រូវបណ្ដោះអាសន្ន ដោយត្រូវដឹកនាំ Sailors តទល់ Young Lions ក្នុងជំនួប SPL នៅថ្ងៃទី៨ ខែកុម្ភៈ។ សម្រាប់ការស្វែងរកគ្រូបង្វឹកថ្មីកំពុងដំណើរការ ហើយអ្នកស្នងតំណែងរបស់ Rankovic នឹងត្រូវប្រកាសក្នុងពេលឆាប់ៗនេះ។
ចំពោះការចែកផ្លូវនឹងគ្រូ Rankovic ក្លិប Sailors បានសរសេរក្នុងសេចក្តីប្រកាសរបស់ខ្លួបថា៖« ក្លិបសូមសម្តែងការអរគុណចំពោះ Rankovic ដែលបានដឹកនាំក្រុមរបស់យើងដ៏ជោគជ័យក្នុងប្រវត្តិសាស្ត្រ។ យើងសូមជូនពរ Rankovic ទទួលបានជោគជ័យនាពេលអនាគត»។
ការចាកចេញរបស់គ្រូសញ្ជាតិស៊ែប៊ី វ័យ៤៧ឆ្នាំ បានកើតឡើងបន្ទាប់ពីក្រុម Sailors បានចាញ់ព្រះខ័នស្វាយរៀងកម្ពុជា ២-០ ក្នុងការប្រកួតជើងឯកក្លិបអាស៊ាន Shoppe Cup នៅថ្ងៃទី៥ ខែកុម្ភៈ។
អ្នកគាំទ្រ Sailors សុទ្ធតែបង្ហាញការខកចិត្តចំពោះបរាជ័យនេះ។ នៅលើបណ្ដាញសង្គមអ្នកគាំទ្រក្លិបសិង្ហបុរីមួយនេះបង្ហាញពីក្តីកង្វល់ ដោយអះអាងថា ក្រុមដែលពួកគេគាំទ្រមួយនេះ ធ្វើមិនបានល្អសោះក្រោមការដឹកនាំរបស់លោក Rankovic។
បើតាមការចុះផ្សាយរបស់កាសែត The Straits Times ក្តីរំពឹងរបស់អ្នកគាំទ្រទៅលើក្លិបរបស់ពួកគេខ្ពស់បំផុត គឺការឈ្នះពាន មិនថាពានក្នុងស្រុក ឬក្រៅស្រុកឡើយ។ ដូច្នេះគ្រូបង្វឹក និងកីឡាករ ជាទូទៅត្រូវបានវិនិច្ឆ័យលើសមត្ថភាព និងលទ្ធផលប្រកួតជាសំខាន់តែម្តង។
ក្រោមការដឹកនាំរបស់លោក Rankovic ក្រុម Sailors សុទ្ធតែទទួលបានលទ្ធផលខកចិត្ត ទាំង AFC Champions League Two និង Shopee Cup នេះ។
ក្នុងចំណោម៨ក្រុម Sailors ស្ថិតនៅចំណាត់ថ្នាក់កំពូលតារាង SPL បណ្តោះអាសន្ន ដោយរកបាន២៤ពិន្ទុពីការប្រកួត ៨លើក នាំមុខ BG Tampines Rovers FC ដែលប្រកួត៧លើក ចំនួន ៧ពិន្ទុ។ Albirex Niigata FC (S) ឈរលេខ៣ រកបាន ១៣ពិន្ទុ ក្រោយប្រកួត៦លើក៕
ប្រភព៖ THMEYTHMEY
