អតីតកីឡាករជម្រើសជាតិជម្រើសជាតិអាយុក្រោម២០ឆ្នាំរបស់ហូឡង់ Rick Ketting និងខ្សែការពារសញ្ជាតិហូឡង់ Raul Feher បានបង្ហាញឆន្ទៈខ្ពស់ ក្នុងការរួមចំណែកជួយឱ្យក្លិបភ្នំពេញក្រោន បង្កើតនូវរដូវកាលដ៏អស្ចារ្យមួយ តាមរយៈការប្រយុទ្ធដើម្បីដណ្តើមយកពាន សម្រាប់ការប្រកួតប្រជែង នៅរដូវកាលឆ្នាំ២០២៥-២០២៦ ខាងមុខនេះ។
ដោយមានកម្ពស់១,៨៨ម៉ែត្រ ខ្សែការពារវ័យ២៩ឆ្នាំ Rick Ketting ត្រូវបានផ្លាស់ចេញពីក្លិប VVV-Venlo ដែលលេងនៅលីគទី២របស់ហូឡង់ ដើម្បីមកចូលរួមជាមួយក្លិបភ្នំពេញក្រោន ដោយក្រុមសិង្ហក្រហម បានប្រកាសស្វាគមន៍រូបគេ កាលពីថ្ងៃចន្ទ ជាមួយខ្សែប្រយុទ្ធសញ្ជាតិអ៊ុយក្រែន Maksym Pryadun។
មុនពេលមកចូលរួមជាមួយក្លិប VVV-Venlo នៅឆ្នាំ២០២២ Rick Ketting ធ្លាប់លេងឱ្យក្លិបចំនួន៥ ដែលស្ថិតនៅប្រទេសផ្សេងៗគ្នា ដោយចាប់ផ្តើមតាំងពីឆ្នាំ២០១៤មក ហើយជាមួយបទពិសោធន៍ជាង១០ឆ្នាំនេះ ត្រូវបានគេរំពឹងថា Rick Ketting នឹងក្លាយជាខ្សែការពារដ៏រឹងមាំរបស់ភ្នំពេញក្រោន។
នៅក្នុងបទសម្ពាធផ្ទាល់ជាមួយក្រុមការងាររបស់ក្លិបភ្នំពេញក្រោន កាលពីថ្ងៃអង្គារ Rick Ketting បានអះអាងថា រូបគេហាក់មានការនឿយហត់បន្តិច ក្នុងការធ្វើដំណើរផ្លូវឆ្ងាយមកកាន់ប្រទេសកម្ពុជា ដែលជាទឹកដីថ្មី សម្រាប់ការបោះជំហានមកប្រកបអាជីពបាល់ទាត់ នៅតំបន់អាស៊ី ជាលើកដំបូងនេះ។
Rick Ketting បាននិយាយថា៖ «ខ្ញុំមិនសូវបានដឹងច្រើនអំពីលីគកម្ពុជានោះទេ តែភ្នាក់ងាររបស់ខ្ញុំ បានទាក់ទងជាមួយក្លិប។ ខ្ញុំឃើញពីរូបភាពល្អរបស់ក្លិបភ្នំពេញក្រោន ហើយនេះជាជំហានបន្ទាប់ទៀតសម្រាប់ខ្ញុំ ដែលមកទីនេះ ចូលរួមជាមួយលីគនៅតំបន់អាស៊ី។ នេះគឺជារឿងល្អមួយ សម្រាប់អាជីពខ្ញុំ ក្នុងការបោះជំហានបន្ថែមទៀត និងស្វែងរកអាជីពនៅទីនេះ»។
សម្រាប់ការមកចូលរួមជាមួយក្លិបភ្នំពេញក្រោននេះ Rick Ketting បានបង្ហាញឆន្ទៈខ្ពស់ ក្នុងការជួយឱ្យក្រុមសិង្ហក្រហមឈ្នះពាន និងដណ្តើមបានលទ្ធផល នៅក្នុងការប្រកួតវគ្គជម្រុះពានរង្វាន់ AFC Challenge League 2025/2026 ហើយរូបគេក៏សង្ឃឹមបានឃើញអ្នកគាំទ្រដ៏ស្មោះស្ម័គ្ររបស់ភ្នំពេញក្រោន មកគាំទ្រនៅទីលាន ដើម្បីរួមគ្នាបង្កើតរដូវកាលដ៏អស្ចារ្យមួយជាមួយគ្នា។
Rick Ketting បញ្ជាក់ថា៖ «វាសំខាន់សម្រាប់ខ្ញុំ ក្នុងការធ្វើការជាមួយមិត្តរួមក្រុម គ្រូបង្វឹក ហើយខ្ញុំរីករាយដែលមកទីនេះ និងប្រយុទ្ធដើម្បីពានរង្វាន់ សម្រាប់ប្រទេស និងដើម្បីពានរង្វាន់AFC Challenge League។ ខ្ញុំនឹងធ្វើអ្វីគ្រប់យ៉ាង ដើម្បីក្រុម សម្រាប់មិត្តរួមក្រុម សម្រាប់ខ្លួនឯង ដើម្បីឱ្យល្អនៅរដូវកាលនេះ។ ខ្ញុំសង្ឃឹមថា នឹងអាចឃើញពួកគេ នៅទីលាន មើលការប្រកួត និងគាំទ្រដល់ការប្រកួតរបស់យើង ហើយយើងនឹងអាចបង្កើតរដូវកាលដ៏អស្ចារ្យមួយ»។
ចំណែកខ្សែការពារកណ្តាលរបស់រូម៉ានី Raul Feher ដែលបានចុះកិច្ចសន្យាជាមួយក្រុមភ្នំពេញក្រោន កាលពីថ្ងៃទី២៧ ខែមិថុនានោះ ក៏បានបង្ហាញឆន្ទៈខ្ពស់ ក្នុងការជួយឱ្យក្រុមសិង្ហក្រហម ដណ្តើមបានពាន ខណៈកីឡាករវ័យ២៨ឆ្នាំ កម្ពស់១,៩០ម៉ែត្ររូបនេះ ធ្លាប់មានបានបទពិសោធន៍លេងច្រើនជាមួយក្លិបអាជីពលំដាប់មធ្យម នៅប្រទេសអេស្ប៉ាញ ហើយចុងក្រោយរូបគេលេងឱ្យក្លិប Inter Club d’Escaldes របស់អង់ដូរ៉ា។
Raul Feher បាននិយាយថា៖ «ខ្ញុំពិតរំភើប ដែលបានមកទីនេះ ដោយសារនេះជាឱកាសដ៏ល្អមួយសម្រាប់ខ្ញុំ។ ខ្ញុំពិតជាមានភាពវិជ្ជមានណាស់ និងរីករាយ ដែលបានក្លាយជាកីឡាករនៅក្នុងក្រុមភ្នំពេញក្រោន ហើយខ្ញុំពិតជាចង់ឈ្នះពានជាច្រើន ជាមួយគ្រួសារមួយនេះ។ ខ្ញុំចង់ឱ្យអ្នកគាំទ្រមកទីលានគាំទ្រយើង ដើម្បីឱ្យក្រុមយើងមានភាពល្អប្រសើរទាំងអស់គ្នា»។
ចំណែកខ្សែប្រយុទ្ធសញ្ជាតិអ៊ុយក្រែន Maksym Pryadun ក៏បានត្រៀមខ្លួនរួចរាល់ ក្នុងការលេងឱ្យភ្នំពេញក្រោន។ កីឡាករមានកម្ពស់១,៧៦ម៉ែត្ររូបនេះ មានបទពិសោធន៍ច្រើន ដោយធ្លាប់លេងឱ្យក្លិបចំនួន១១ផ្សេងៗគ្នា ដែលភាគច្រើននៅលីគអ៊ុយក្រែន មុនពេលរូបគេផ្លាស់មកលេងឱ្យក្លិប Sliema Wanderers FC នៃលីគកំពូលម៉ាល់តា ហើយវត្តមានរបស់កីឡាករវ័យ២៨ឆ្នាំ Maksym Pryadun នឹងធ្វើឱ្យតំបន់ប្រយុទ្ធកណ្តាលរបស់ភ្នំពេញក្រោន កាន់តែមានភាពរឹងមាំ។
គួរបញ្ជាក់ថា គិតមកដល់ពេលនេះ ភ្នំពេញក្រោន ទើបតែចុះកិច្ចសន្យាជាមួយកីឡាករបរទេសបាន៤នាក់ទៀត គឺកីឡាករចំណូលថ្មី Rick Ketting, Raul Feher, Maksym Pryadun និងខ្សែការពារកូរ៉េខាងត្បូង Yi young Park ដែលបានបន្តកុងត្រាថ្មីជាមួយភ្នំពញេញក្រោន ខណៈការប្រកួតលីគកំពូលកម្ពុជា នារដូវកាលថ្មីនេះ ក្លិបនីមួយៗ អាចចុះឈ្មោះកីឡាករបរទេសបាន៦នាក់ និងកីឡាករបរទេសចូលសញ្ជាតិខ្មែរបាន១នាក់ទៀត។
តាមការកំណត់នេះ ភ្នំពេញក្រោន គឺមានការខាតបង់ ខណៈកីឡាករបរទេសចូលសញ្ជាតិខ្មែររបស់ខ្លួនទាំង៣នាក់ រួមមានខ្សែការពារជប៉ុន Takaki Ose, Yudai Ogawa និងខ្សែបម្រើប្រយុទ្ធកូឡុំប៊ី Nieto Rondon សុទ្ធតែបានចាកចេញ ទៅលេងឱ្យក្លិបផ្សេងនោះ ហេតុនេះ ភ្នំពេញក្រោន អាចចុះកុងត្រានាំយកកីឡាករបរទេសមកជួយក្រុម នៅរដូវកាលនេះ បានត្រឹម២នាក់ទៀតទេ៕
