(សៀងហៃ)៖ កីឡាករស្នូកឃ័រ Kyren Wilson បានវាយបកទម្លាក់កីឡាករម្ចាស់ផ្ទះចិន Zhao Xintong ដែលចិញ្ចឹមចិត្ត ចង់ឡើងវគ្គផ្តាច់ព្រ័ត្រកម្មវិធី Shanghai Masters 2025 នារសៀលថ្ងៃសៅរ៍ ទី០២ ខែសីហាម្សិលមិល។ នេះបើយោងតាមការចេញផ្សាយដោយ BBC។
ទន្ទឹមគ្នានោះដែរ ជើងខ្លាំងអន្តរជាតិអង់គ្លេស Wilson ក៏បានបញ្ចប់កំណត់ត្រាប្រកួតមិនចាញ់ចំនួន ២៦ប្រកួតជាប់ៗគ្នា របស់ Zhao ទៀតផង។
Wilson បានធ្វើការវាយបកយកជ័យជម្នះវិញដ៏អស្ចារ្យ តាមរយៈឈ្នះ ៦ហ្វ្រេមជាប់ៗគ្នាតែម្តង ក្រោមលទ្ធផលផ្លូវការ ១០-៥ បន្ទាប់ពីគូប្រជែង Zhao បានបើកការនាំមុខ ៥-៤ តាំងពីវគ្គទី១។ កីឡាករវ័យ ៣៣ឆ្នាំរូបនេះបានយកឈ្នះនៅ ៣សិតចុងក្រោយមានពិន្ទុជ័យជម្នះតែ ៧០ ១០១ និង ៥១ប៉ុណ្ណោះ។
Wilson នឹងត្រូវប្រកួតវគ្គផ្តាច់ព្រ័ត្រទល់នឹង Ali Carter ដែលបានចូលរួមនៅ Shanghai Masters 2025 ជំនួសកីឡាករ Mark Allen ដែលបានដកខ្លួន បន្ទាប់ពីកីឡាករអង់គ្លេសរូបនេះក៏បានទម្លាក់ Mark Selby ១០-៦ ពីក្នុងវគ្គ ៤នាក់ចុងក្រោយផងដែរ។
សម្រាប់ម្ចាស់ជើងឯកនៅថ្ងៃអាទិត្យ ទី០៣ ខែសីហានេះ នឹងទទួលបានរង្វាន់ជាទឹកប្រាក់ប្រមាណ ២១០,០០០ផោន អមដោយពានប្រចាំព្រឹត្តិការណ៍មួយទៀតផង៕
ប្រភព៖ FRESH NEWS
