(បរទេស)៖ លោក Steve Clarke អ្នកចាត់ការទូទៅក្រុមបាល់ទាត់ជម្រើសជាតិស្កុតឡេន បានបង្ហាញបញ្ជីឈ្មោះកីឡាករចំនួន ២៥នាក់ចុងក្រោយ ក្នុងការត្រៀមប្រកួតជម្រុះ World Cup 2026 នាខែកញ្ញាខាងមុខទល់នឹងដាណឺម៉ាក និងប៊ែឡារុស។ នេះបើយោងតាមការចេញផ្សាយដោយ BBC។
ពួកគេនឹងប៉ះក្រុមជម្រើសជាតិដាណឺម៉ាក ទៅទីក្រុង Copenhagen នាថ្ងៃទី០៥ ខែកញ្ញា មុនពេលពើបប្រទះនឹងប៊ែឡារុស នៅ ៣ថ្ងៃបន្ទាប់នៅប្រទេសហុងគ្រី នៃកម្មវិធីជម្រុះ World Cup ប្រចាំតំបន់អឺរ៉ុប (UEFA) ដែលនៅសល់ ៦ប្រកួតក្នុងរយៈពេលជាង ៣ខែប្រចាំពូល C ជាមួយនឹងជើងខ្លាំងក្រិចផងដែរ។
លក្ខខណ្ឌនៃការប្រកួតជម្រុះនេះដែរ គឺយកតែក្រុមមានពិន្ទុខ្ពស់ជាងគេប្រចាំពូលនីមួយៗ ក្នុងការទទួលបានកៅអីទៅលេងជុំចុងក្រោយ ៤៨ប្រទេស (ក្រុម) នៅ World Cup ឆ្នាំក្រោយដោយមានអាមេរិក មិចស៊ិក និងកាណាដា ធ្វើម្ចាស់ផ្ទះរួមគ្នា គ្រាដែលស្កុតឡេន ព្យាយាមស្វែងរកកៅអីលេងជាលើកដំបូង គិតចាប់តាំងពីឆ្នាំ១៩៩៨។
ខាងក្រោមនេះ ជាកីឡាករចំនួន ២៥នាក់ដែលលោក Clarke បានកោះហៅមកពីក្លិបនានាត្រៀមលេង ២ប្រកួតនាខែក្រោយរួមមាន៖
១៖ អ្នកចាំទី-Clark (Heart of Midlothian), Gunn (Nottingham Forest) និង Kelly (Rangers)។
២៖ ខ្សែការពារ-Hanley (Hibernian), Hendry (Al-Etiffaq), Hickey (Brentford), Hyam (Blackburn Rovers), Johnston (Sturm Graz), McKenna (Dinamo Zagreb), Ralston (Celtic), Robertson (Liverpool), Souttar (Rangers) និង Tierney (Celtic)។
៣៖ ខ្សែបម្រើ-Christie (Bournemouth), Ferguson (Bologna), Gannon Doak (Bournemouth), Gilmour (Napoli), McGinn (Aston Villa), McLean (Norwich City), McTominay (Napoli) និង Miller (Udinese)។
៤៖ ខ្សែប្រយុទ្ធ-Adams (Torino), Bowie (Hibernian), Dykes (Birmingham City) និង Hirst (Ipswich Town)៕
ប្រភព៖ FRESHNEWS
