ក្លិបទាំង ២០ ក្នុងក្របខណ្ឌ Premier League ចំណាយសរុប ៤,១៨ ពាន់លានដុល្លារអំឡុងទីផ្សារដូរដោះកីឡាករលើកទី១ ប្រចាំរដូវកាល ២០២៥-២៦ លើសឆ្នាំមុនដល់ទៅជិតពាក់កណ្តាល និងច្រើនជាងការចំណាយរបស់ក្លិបនៅ Bundesliga, La Liga, Ligue 1 និង Serie A រួមបញ្ចូលគ្នាទៅទៀត។
នៅថ្ងៃចុងក្រោយនៃទីផ្សារដោះដូរកីឡាករលើកទី១បិទទ្វារ (Deadline Day) វេលាម៉ោង១២ និង ០០នាទី យប់ថ្ងៃទី១ ខែកញ្ញា ក្លិប Liverpool បានចំណាយកប់ពពក ១៧៦លានដុល្លារបន្ថែមទៀតដើម្បីទិញយកខ្សែប្រយុទ្ធ Alexander Isak ពី Newcastle United និងជាក្លិបដែលចាយច្រើនដាច់នេះនៅដើមរដូវកាលនេះ។ មួយចុងក្រោយនេះ ក្លិបទាំងអស់នៅ EPL ចំណាយ ៣,៦៩ពាន់លានដុល្លារលើការទិញដូរកីឡាករ និងសរុបតាំងពីថ្ងៃបើកដំណើរការមក ចាយសរុបអស់ ៤,១៨ ពាន់លានដុល្លារ។
កាលពីរដូវកាលមុន អំឡុងទីផ្សារដោះដូរលើកទី១ដូចគ្នានេះ ក្លិបក្នុងលីគកំពូលអង់គ្លេសចំណាយអស់ត្រឹម ២៦៥ពាន់ដុល្លារប៉ុណ្ណោះ ពោលគឺតិចជាងឆ្នាំនេះដល់ទៅជិតពាក់កណ្តាល។
ចំណាយ ៤,១៨ ពាន់លានដុល្លារ មានន័យថា ក្លិបនៅ EPL ចាយច្រើនជាងការចំណាយរបស់ក្លិបនៅលីគកំពូលអាល្លឺម៉ង់ Bundesliga, La Liga របស់អេស្ប៉ាញ, លីគកំពូលបារាំង Ligue 1 និង អ៊ីតាលី Serie A រួមបញ្ចូលគ្នាទៅទៀត។
ចំណោមក្លិបទាំង ២០ នៅអង់គ្លេស ហង្សក្រហម Liverpool ចំណាយច្រើនដាច់គេសរុប ៥៦២លានដុល្លារ តាមពីក្រោយដោយ Chelsea ៣៨៥លានដុល្លារ និង Arsenal នៅលេខ៣ ចាយ ៣៤៤លានដុល្លារ។ Newcstle United ចាយច្រើនជាងគេចំណាត់លេខ៤ ចំនួន ៣៣៨លានដុល្លារ, Manchester United លេខ៥ ចាយ ២៩២លានដុល្លារ ខណៈ Fulham ចាញតិចជាងគេត្រឹម ៤៦លានដុល្លារ៕
ប្រភព៖ THMEYTHMEY
