ខ្សែប្រយុទ្ធជម្រើសជាតិ ព័រទុយហ្គាល់ កីឡាករ Cristiano Ronaldo បានបង្កើតកំណត់ត្រាថ្មី ក្លាយជាកីឡាករដំបូងគេនៅក្នុងពិភពលោក សម្រាប់ការរកបានគ្រាប់បាល់បានច្រើនជាង ១០០ គ្រាប់ ឱ្យ ៤ ក្រុមផ្សេងៗគ្នា។
កំណត់ត្រានេះ Ronaldo បានសម្រេចបានជាផ្លូវការ បន្ទាប់ពីគាត់រកបានគ្រាប់បាល់ចុងក្រោយមួយគ្រាប់ឱ្យក្រុម Al-Nassr កាលពីថ្ងៃ សៅរិ៍ ទី ២៣ ខែ សីហា ឆ្នាំ ២០២៥ ដែលជាការប្រកួតវគ្គផ្តាច់ព្រ័ត្រពាន Saudi Super Cup ទល់នឹង Al-Ahli។ ទោះបីជាយ៉ាងណា ក្រោយបញ្ចប់ការប្រកួត ក្រុម Al-Nassr បានបរាជ័យក្រោមថ្វីជើងក្រុម Al-Ahli នៅវគ្គបាល់កាត់សេចក្តី ១១ ម៉ែត្រ ៥-៣ បន្ទាប់ពី ៩០ នាទីស្មើគ្នា ២-២។
នេះជាក្រុមទី ៤ នៅក្នុងអាជីពរបស់ Ronaldo ដែលគាត់រកបានគ្រាប់បាល់បានច្រើនជាង ១០០ គ្រាប់។ ដោយឡែក ៣ ក្រុមផ្សេងទៀត គឺនៅ Real Madrid រកបានគ្រាប់បាល់បាន ៤៥០ គ្រាប់, Manchester United រកបាន ១៤៥ គ្រាប់ និង Juventus រកបាន ១០១ គ្រាប់។
គួរឱ្យដឹងថា ក្រៅអំពីក្លិបអាជីព នៅក្រុមជម្រើសជាតិក៏គាត់រកបានគ្រាប់បាល់បានច្រើនជាង ១០០ គ្រាប់ផងដែរ ដោយនៅជម្រើសជាតិ ព័រទុយហ្គាល់ គាត់រកបានគ្រាប់បាល់បានចំនួន ១៣៨ គ្រាប់៕
ប្រភព៖ KAMPUCHEATHMEY
