ក្រុមខ្លាំង ៤ បានឡើងមកកាន់វគ្គពាក់កណ្តាលផ្តាច់ព្រ័ត្រពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ រដូវកាល ២០២៥/២៦ (ថ្នាក់ខេត្ត) ត្រូវប្រកួតជើងទី១ នៅថ្ងៃទី ២៦ ខែ វិច្ឆិកា ឆ្នាំ ២០២៥។
ការប្រកួតជើងទី១ ក្រុម ភ្នំពេញហ្គាឡាក់ស៊ី ប្រកួតជាមួយ ឡាយអ៉ិនឃីងសៀមរាប នៅកីឡដ្ឋាន អាគីហ៊ីរ៉ូកាតុ ខេត្តសៀមរាប វេលាម៉ោង ៣:៣០នាទីរសៀល។ ចំណែក ក្រុមខេត្ត ត្បូងឃ្មុំ ត្រូវជួបជាមួយក្រុមខេត្ត កំពង់ចាម នៅទីលានវិទ្យាល័យ ព្រះសីហនុ វេលាម៉ោង ៣:៣០នាទីរសៀល។
ក្រុមត្បូងឃ្មុំ កំពុងឈរជាក្រុមជោគជ័យជាងគេបំផុត សម្រាប់ការប្រកួតពានរង្វាន់សម្តេចជោថ្នាក់ខេត្ត គិតចាប់តាំងពីចាប់ផ្តើមលើកដំបូងនៅឆ្នាំ ២០១៨។ ពួកគេបានឡើងដល់វគ្គពាក់កណ្តាលផ្តាច់ព្រ័ត្របានចំនួន ៦ លើក ដោយគិតទាំងរដូវកាល ២០២៥-២០២៦។ ជាលទ្ធផលពួកគេបានឡើងដល់វគ្គផ្តាច់ព្រ័ត្រ ៥ លើក គឺឈ្នះជើងឯកបានចំនួន ២ លើក គឺនៅឆ្នាំ ២០១៩ និងរដូវកាលមុន ២០២៤-២០២៥។
ឡែកកីឡាករ ដែលកំពុងលេចធ្លោបំផុតនៅរដូវកាលនេះវិញ ក៏ជាកីឡាកររបស់ខេត្ត ត្បូងឃ្មុំ ផងដែរ ដោយបច្ចុប្បន្ន សារី តៃម៉ូ កំពុងឈរនៅតំណែងកីឡាកររកបានគ្រាប់បាល់ច្រើនជាងគេ (Top Scorers) ពោលគឺចំនួន ២១ គ្រាប់។ រីឯកីឡាករ ទេព សើហ្វីអ៉ី របស់ក្រុមខេត្ត កំពត ជាកីឡាករឈរនៅតំណែងលេខ ២ ប៉ុន្តែចាញ់គ្រាប់បាល់ តៃម៉ូ ដល់ទៅ ១១ គ្រាប់ឯណោះ ដោយបច្ចុប្បន្នកីឡាកររកបាន ១០ គ្រាប់៕
ប្រភព៖ KAMPUCHEATHMEY
