ថ្នាក់ដឹកនាំគណៈកម្មាធិការជាតិអូឡាំពិកកម្ពុជា (NOCC) បានយកការប្រារព្ធខួបលើកទី១៣១ នៃទិវាអូឡាំពិក (Olympic Day) ឆ្នាំ២០២៥ ដែលបានរៀបចំឡើង នៅពហុកីឡដ្ឋានជាតិមរតកតេជោ កាលពីថ្ងៃទី២២ ខែមិថុនា ដើម្បីជាការលើកទឹកចិត្ត និងជំរុញឱ្យមនុស្សជាតិគ្រប់វ័យ ចាប់យកការលេងកីឡា ឬធ្វើលំហាត់ប្រាណឱ្យបានទៀតទាត់ ដើម្បីលើកកម្ពស់សុខុមាលភាពជាសកល។
លោក ថោន ខុន ទេសរដ្ឋមន្រ្តីទទួលបន្ទុកជំរុញការអភិវឌ្ឍចលនាកីឡា និងជាប្រធាន NOCC អះអាងថា ទាំងចលនាអូឡាំពិកកម្ពុជា និងចលនាអូឡាំពិកទូទាំងពិភពលោក បានប្រារព្វខួប លើកទី១៣១ នៃទិវាអូឡាំពិក ដើម្បីរំឭកអំពីការបង្កើតចលនាអូឡាំពិកសម័យទំនើប (២៣ មិថុនា ១៨៩៤ – ២៣ មិថុនា ២០២៥) ដែលផ្តួចផ្តើមបង្កើតឡើងវិញ ដោយស្ថាបនិកជនជាតិបារាំង លោក Pierre de Coubertin។
លោកបន្ថែមថា ខួបនៃទិវាអូឡាំពិក ឆ្នាំនេះ រៀបចំឡើងក្រោមមូលបទ “ធ្វើចលនាទាំងអស់គ្នា – Let’s Move” ជាមួយយុទ្ធនាការជាតិ “យុវជនម្នាក់ ចេះកីឡាមួយប្រភេទយ៉ាងតិច ប្រចាំជីវិត” ដែលបានដាក់ចេញនៅក្នុងយុទ្ធបញ្ចកោណ-ដំណាក់ទី១ របស់រាជរដ្ឋាភិបាល ក្នុងនីតិកាលទី៧ នៃរដ្ឋសភា ក្រោមការដឹកនាំរបស់លោកនាយករដ្ឋមន្រ្តី ហ៊ុន ម៉ាណែត។
ជាមួយគ្នានេះ អង្គការសុខភាពពិភពលោក (WHO) បានបង្ហាញក្តីបារម្ភយ៉ាងខ្លាំងអំពីបញ្ហាអសកម្មជាសកលនៃការធ្វើលំហាត់ប្រាណ និងការលេងកីឡារបស់កុមារ យុវជន និងមនុស្សពេញវ័យ ព្រោះយោងតាមរបាយការណ៍ស្រាវជ្រាវរបស់ WHO បានបង្ហាញថា មនុស្សពេញវ័យ ១ នាក់ក្នុងចំណោម ៤ នាក់ និង ៨០ភាគរយ នៃយុវជនមិនបានធ្វើលំហាត់ប្រាណ ឬលេងកីឡាឱ្យបានគ្រប់គ្រាន់តាមកម្រិតអប្បបរមា ដែលត្រូវការសម្រាប់ទទួលបានសុខភាពល្អនោះទេ។
ជាមួយក្តីបារម្ភនេះ លោក ថោន ខុន បញ្ជាក់ថា៖ «គណៈកម្មាធិការអូឡាំពិកអន្តរជាតិ (IOC) បានយកឱកាសនៃវេទិកាប្រារព្វពិធីអបអរសាទរខួប លើកទី១៣១ នៃទិវាអូឡាំពិក ឆ្នាំ២០២៥ នៅទូទាំងពិភពលោកនេះ ដើម្បីគាំទ្រដល់បេសកកម្មរបស់អង្គការ WHO ក្នុងការបំផុសស្មារតី “ហាត់ប្រាណ ឬលេងកីឡាយ៉ាងតិច ១ម៉ោង ក្នុង ១ថ្ងៃ” សម្រាប់កុមារ និងយុវជន និង “៤៥នាទី ក្នុង ១ថ្ងៃ” សម្រាប់មនុស្សពេញវ័យ នៅទូទាំងពិភពលោក ឱ្យមានទម្លាប់ហាត់ប្រាណ និងលេងកីឡាជាប្រចាំ ដើម្បីលើកកម្ពស់សុខុមាលភាព»។
ចំពោះខ្លឹមសាររួមនៃចលនាអូឡាំពិកនេះ គឺជាចលនាកីឡាទូទាំងពិភពលោក ក្នុងទិសដៅរួមចំណែកកសាងពិភពលោក ប្រកបដោយសន្តិភាព និងកាន់តែ ស្រស់បំព្រង តាមរយៈកីឡា ស្របតាមទស្សនវិជ្ជាអូឡាំពិក “To Build a Peaceful and Better World through Sport and Olympism” ជាមួយគុណតម្លៃស្នូលទាំង ៣ រួមមាន ឧត្តមភាព ការគោរព និងមិត្តភាព “Excellence, Respect and Friendship”។
