ក្លិប Manchester United ចាយពេលវេលាជាង១២ឆ្នាំ បែកបាក់ស្មារតីរួចក្នុងក្រុម ចាប់តាំងពីការចាកចេញរបស់លោក Sir Alex Ferguson អ្នកចាត់ការដ៏អស្ចារ្យបំផុតក្នុងប្រវត្តិសាស្ត្រ កាលពីឆ្នាំ២០១៣មក។ ស្របពេលក្រុមរហស្សនាមបិសាចក្រហម ត្រៀមខ្លួនសម្រាប់ប្រកួតប្រជែងរដូវកាលថ្មី ខ្សែការពារ Luke Shaw បានចេញមុខអះអាងថា អ្នកចាត់ការក្រុមថ្មី លោក Ruben Amorim មានចំណុចពិសេស អាចស្តារស្មារតីរួមក្រុមល្អខ្លាំងឡើងវិញ ក្រោយក្រុមបាត់បង់សាមគ្គីភាព អស់ពេលជាង១២ឆ្នាំ។
Man Utd ទើបតែបង្ហាញខ្លួនប្រកួតលើក២ប៉ុណ្ណោះ ក្នុងការប្រកួតមិត្តភាពកម្តៅសាច់ដុំត្រៀមបើករដូវកាលថ្មី លើទឹកដីអាម៉េរិក ប៉ុន្តែទម្រង់លេងដ៏ល្អរបស់ក្រុម យកឈ្នះការប្រកួតជាប់ៗគ្នា ធ្វើឱ្យមនុស្សជាច្រើនសម្លឹកមើលលើការពង្រឹងសមត្ថភាពល្អជាថ្មីឡើងវិញរបស់ក្រុមអង់គ្លេសមួយនេះ។ រដូវកាលមុន Man Utd ធ្លាក់ទម្រង់លេងខ្លាំងរហូតឈរចំណាត់ថ្នាក់លេខ១៥ នៅតារាង Premier League។
ចប់រដូវកាល ២០២៤-២៥ ភ្លាម ការផ្លាស់ប្តូរប្រព័ន្ធលេងក្នុងក្រុម ជាពិសេសកីឡាករ ជារឿងត្រូវធ្វើដំបូងគេបង្អស់ និងជាតម្រូវការចាំបាច់ របស់អ្នកចាត់ក្រុមសញ្ជាតិព័រទុយហ្កាល់ ។ មកដល់ពេលនេះ លទ្ធផលចាប់ផ្តើមបង្ហាញបណ្តើរៗ។
ដំបូងឡើយ កីឡាករ៥រូប មានភាពចម្រូងចម្រាសជាមួយក្លិប ត្រូវបានដកឈ្មោះចេញពីបញ្ជីក្រុម ហើយបើកឱកាសឱ្យស្វែងរកក្លិបថ្មី ក្នុងនោះរួមមាន Jadon Sancho, Marcus Rashford ផ្លាស់ទៅ Barcelona, Tyrell Malacia, Alejandro Garnacho និង Antony។ កីឡាករណា ដែលពុំទាន់អាចរកក្លិបថ្មីបាន ពួកគេតម្រូវឱ្យហ្វឹកហាត់តែឯង ក្នុងទីលានហ្វឹកហាត់របស់ក្រុម ក្រោយពេលក្រុមឈុតធំហ្វឹកហាត់រួច។
ឆ្លើយតបនឹងការដកឈ្មោះកីឡាករទាំង៥រូប មិនសំខាន់ចោល និងធ្វើឱ្យស្មារតីក្រុមធ្លាក់ចុះ លោក Amorim បាននាំចូលកីឡាករលេចធ្លោ២រូប មានខ្សែបម្រើប្រយុទ្ធ Matheus Cunha និង Bryan Mbeumo បានបង្ហាញសមត្ថភាពដ៏ភ្ញាក់ផ្អើលនៅក្រុមថ្មី ទាំងនៅការហ្វឹកហាត់ និងក្នុងពេលប្រកួត។
ក្រៅពីការពង្រឹងសមត្ថភាពក្រុម ទាំងផ្លូវចិត្ត កម្លាំងកាយត្រឡប់មកវិញ និងរួមបញ្ចូលទាំងប្រព័ន្ធលេងដ៏ស៊ីចង្វាក់ សហការគ្នាយ៉ាងល្អ រឿងមួយដ៏ពិសេសបានកើតមានក្នុងក្រុម ហើយត្រូវបានគេកត់សម្គាលឃើញនោះ គឺការតាំងចិត្ត និងស្មារតីរួមជាក្រុម។
ត្រង់ចំណុចនេះ ខ្សែការពារ Luke Shaw បានចេញមុខអះអាងថា ការដឹកនាំរបស់លោក Amorim បានបង្រួបបង្រួមស្មារតីក្រុមឱ្យត្រឡប់មកវិញ បន្ទាប់ពីក្រុមបានបាត់បង់តាំងពីជំនាន់នៃការចាកចេញរបស់ លោក Sir Alex Ferguson មក។ រយៈពេលជាង ១២ឆ្នាំ Man Utd ជួបបញ្ហាប្រព័ន្ធលេងក្រុម ហើយពុំដែលអាចប្រជែងឈ្នះពានរង្វាន់ Premier League បានឡើយ ចាប់តាំងពីឆ្នាំ២០១៣ ជាពេលក្រុមឈ្នះលើកចុងក្រោយបង្អស់ ហើយស្ថិតក្រោមការដឹកនាំរបស់លោក Sir Alex Ferguson កំពូលអ្នកចាត់ការក្រុមដ៏អស្ចារ្យក្នុងប្រវត្តិសាស្ត្របាល់ទាត់។
Luke Shaw បាននិយាយសរសើរដល់ការដឹកនាំរបស់លោក Amorim ទាក់ទងនឹងការស្តារស្មារតីរួមក្រុមឡើងវិញដូច្នេះថា៖ «ចិត្តគំនិតរបស់គាត់ ការទាមទាររបស់គាត់ ព្រមទាំងការគិតវែងឆ្ងាយមកលើក្រុមមួយនេះ ខ្ញុំគិតថាគាត់នឹងមិននៅស្ងៀមឱ្យរឿងដដែលៗកើតឡើងឡើយ។ ពេលនេះមិនមានបញ្ហាជាប់គាំង ឬការធ្លាក់ចុះស្មារតី ទឹកចិត្តក្នុងក្រុមទៀតឡើយគ្មានទៀតទេ។ ហើយគ្រប់គ្នាពេលនេះ ខ្ញុំផ្តោតលើក្រុមរួមតែមួយ គាត់បានធ្វើឱ្យស្មារតីរួមក្នុងក្រុមយើងកើតឡើងវិញ ហើយមានភាពច្បាស់លាស់ណាស់។ […] ក្រុមកីឡាករទាំងអស់ បានទទួលយកគំនិតគាត់ ហើយគាំទ្រគាត់ជានិច្ច។»។
ដោយឡែកខ្សែការពារ Luke Shaw វ័យ ៣០ឆ្នាំ នៅការប្រកួតមិត្តភាព ២លើក លើទឹកដីអាម៉េរិក គេតែងបង្ហាញខ្លួននៅជម្រើស១១នាក់ដំបូង ហើយបំពេញតួនាទីបានយ៉ាងល្អ សហការជាមួយនឹងកីឡាករចំណូលថ្មី ក៏ដូចជាមិត្តរួមក្រុមចាស់ពីមុន ដើម្បីស្វែងជ័យជម្នះឱ្យក្រុម។ ជាលទ្ធផល ២ប្រកួតទល់នឹងក្រុមមកពីក្របខណ្ឌ Premier League ដូចគ្នា នៅក្នុងពានមិត្តភាព Premier League Summer Serie លើទឹកដីអាម៉េរិក ក្រុម Man Utd យកឈ្នះការប្រកួតជាប់ៗគ្នា។
ប្រភព៖ ThmeyThmey
