ក្លិបបាល់ទាត់ព្រះខ័នរាជស្វាយរៀង បានសម្រេចដាក់លក់ សំបុត្រទស្សនាការប្រកួតតាម អនឡាញសុទ្ធ ១០០% ពេញមួយរដូវកាលថ្មី ដោយគ្មានការលក់សំបុត្រដោយក្រដាសផ្ទាល់ដៃឡើយ។
តាមការឲ្យដឹងពីតំណាងផ្នែកទីផ្សារនៃក្លិបបាល់ទាត់ព្រះខ័នរាជស្វាយរៀងថា សម្រាប់ការប្រកួតរដូវកាល ២០២៥-២០២៦ ក្លិបបានសម្រេចដាក់លក់សំបុត្រអនឡាញ គឺ E-Ticket ១០០% ពេញមួយរដូវកាលតាម App PKRSR FC។ គោលបំណងសំខាន់ពីរដែលនាំឲ្យមានការលក់សំបុត្រតាម App សុទ្ធគឺ ទី១ ចូលរួមចំណែកការពារបរិស្ថាន និងភពផែនដី ពីព្រោះមិនមានក្រដាស ឬសន្លឹកអ្វីដែលក្លាយទៅជាសំរាម ឬកាកសំណល់។
ទី២ ដើម្បីការពារសុវត្ថិភាព និងភាពងាយស្រួល។ អ្នកគាំទ្រមិនបារម្ភពីការរហែក ខូច ឬបាត់បង់ឡើយ ហើយជាពិសេសជាបង្កភាពងាយស្រួលក្នុងការទិញ ដោយអ្នកគាំទ្រមិនចាំបាច់ធ្វើដំណើរទៅកន្លែងទិញ ឬរង់ចាំយូរឡើយ។
សម្រាប់រដូវកាលថ្មី ក្លិបបាល់ទាត់ព្រះខ័នរាជស្វាយរៀង ប្រើប្រាស់ពហុកីឡដ្ឋានជាតិមរតកតេជោ នៅរាជធានីភ្នំពេញសម្រាប់ការប្រកួតផ្លូវការទាំងពានរង្វាន់ក្នុងស្រុក និងអន្តរជាតិ៕
ប្រភព៖ KAMPUCHEATHMEY
