កំពូលខ្សែប្រយុទ្ធ Cristiano Ronaldo បង្ហាញខ្លួនយ៉ាងភ្ញាក់ផ្អើលចំពោះមុខអ្នកគាំទ្រហុងកុងរាប់រយនាក់ នៅសារមន្ទីរ CR7 Life នៅពេលរូបគេធ្វើដំណើរទៅទីក្រុងហុងកុង ត្រៀមប្រកួតពានរង្វាន់ Saudi Super Cup ជាមួយ Al Nassr។
អ្នកគាំទ្រហុងកុងរាប់រយនាក់ បានជួបជុំគ្នាកុះករនៅមុខសារមន្ទីរ CR7 Life ក្រោយឮដំណឹងថាកីឡាករវ័យ ៤០ឆ្នាំ នឹងទៅទស្សនាសារមន្ទីរ របស់គេក្នុងទីក្រុង Tsim Sha Tsui ក្រោយផ្ទុះព័ត៌មានពេញបណ្តាញសង្គមរបស់ចិន។
មុន Ronaldo ទៅដល់សារមន្ទីរ អ្នកគាំទ្រហុងកុងរាប់រយនាក់ ឈររង់ចាំជាច្រើនម៉ោង នៅក្រៅទីតាំង ដែលស្ថិតក្នុងផ្សារទំនើបមួយកន្លែងឈ្មោះ K11 Musea ក្នុងទីក្រុង Tsim Sha Tsui កាលពីថ្ងៃទី១៧ សីហា។ បើតាមការចុះផ្សាយរបស់កាសែត South China Morning Post អ្នកគាំទ្រឈររង់ចាំ និងបានស្រែកហៅឈ្មោះ កីឡាករវ័យ ៤០ឆ្នាំ ដើម្បីជាការបង្ហាញការផ្តល់កិត្តិយស។
អំឡុងពេលធ្វើទស្សនកិច្ចក្នុងសារមន្ទីរខ្លួន ខ្សែប្រយុទ្ធក្រុម Al Nassr ក៏បានឈ្លាតពេលខ្លីចេញក្រៅសារន្ទីរ ជួបជាមួយនឹងក្រុមអ្នកគាំទ្រ ហើយគេក៏បានចុះហត្ថលេខាលើអាវមួយចំនួនរបស់ក្រុមអ្នកគាំទ្រហុងកុង។ Ronaldo ចាយពេលជាង ១ម៉ោងកន្លះ នៅទស្សនាសារមន្ទីររបស់គេនោះ ហើយគេបានចាកចេញពីទីតាំងសារមន្ទីរនោះ ក្រោយពេលអ្នកគាំទ្រហុងកុងព្យាយាមរុញគ្នា ដើម្បីឱ្យបានជួបគេ។
មែនទែនទៅសារមន្ទីរ CR7 Life បានបើកដំណើរកាលពីខែកក្កដា មកម្ល៉េះ ហើយដែលជាសារមន្ទីរមួយគត់ក្នុងទ្វីបអាស៊ី បានបើកដំណើរការ ដើម្បីបង្ហាញអំពីរឿងរ៉ាវនៃអាជីពរបស់ អតីតកីឡាករក្រុម Real Madrid, Manchester United និងម្ចាស់ពាន Ballon d’Or ៥សម័យ។
ហុងកុងនឹងរៀបចំការប្រកួតពានរង្វាន់ Saudi Super Cup ចាប់ពីថ្ងៃទី១៩-២៣ សីហា ស្ថិតក្នុងកីឡដ្ឋាន Hong Kong។ ក្លិបចំនួន ៤ រួមមាន Al Nassr របស់ Ronaldo, Al Ittihad, Al Qadisiyah និង Al Ahli នឹងប្រកួតប្រជែងគ្នាដណ្តើមពាន មុនបើករដូវកាលថ្មី Saudi Pro League ដែលជាពានរង្វាន់របស់អារ៉ាប៊ីសាអូឌីតដំបូងរៀបចំនៅអាស៊ីបូព៌ា។
គួររំលឹកថា សារមន្ទីរ CR7 Life ស្ថិតក្នុងទីក្រុងហុងកុង គឺជាសារមន្ទីរទី២ របស់ Ronaldo បន្ទាប់ពីសារមន្ទីរដំបូងរបស់គេបានបើកនៅទីក្រុងកំណើតនៅប្រទេសព័រទុយហ្កាល់៕
ប្រភព៖ THMEYTHMEY
