ខ្សែប្រយុទ្ធ Marcus Rashford បានសរសើរមិត្តរួមក្រុម Lamine Yamal ជាកីឡាករមានទេពកោសល្យបំផុត ដែលរូបគេមិនធ្លាប់បានឃើញ ហើយស្ថិតក្នុងវ័យដូចគ្នានេះ មានតែវីរបុរសប្រេស៊ីល លោក Ronaldo Nazario ម្នាក់ប៉ុណ្ណោះ ដែលមានទេពកោសល្យដូចគ្នា។
បច្ចុប្បន្ន Lamine Yamal មានវ័យទើប ១៨ ឆ្នាំប៉ុណ្ណោះ ប៉ុន្តែរូបគេបានក្លាយជាកម្លាំងស្នូលដ៏សំខាន់នៅក្លិបអ្នកមានបុណ្យ Barcelona ដោយសារតែសមត្ថភាព និងទេពកោសល្យកម្រមានរបស់គេ។ Rashford ជាមនុស្សម្នាក់ ដែលមានភាពកោតក្រែងលើ Yamal ផងដែរ ដោយគេចាត់ទុកខ្សែប្រយុទ្ធអេស្ប៉ាញរូបនេះ ជាកីឡាករមានទេពកោសល្យបំផុតមិនធ្លាប់មាន។
នៅក្នុងកិច្ចសម្ភាសជាមួយ SPORT ខ្សែប្រយុទ្ធសញ្ជាតិ អង់គ្លេស វ័យ ២៧ ឆ្នាំត្រូវបានគេសួរថា តើអ្នកគិតថា Yamal គឺជាកីឡាករ ដែលមានទេពកោសល្យបំផុតនៅក្នុងវ័យរបស់គាត់នេះមែនទេ? ភ្លាមនោះ Rashford បានឆ្លើយទៅវិញថា៖ «បាទពិតមែនហើយ។ គាត់គឺជាកីឡាករ មានទេពកោសល្យបំផុត ដែលខ្ញុំធ្លាប់បានឃើញនៅក្នុងវ័យរបស់គាត់នេះ។ ខ្ញុំមិនដែលបានលេងជាមួយ ឬឃើញកីឡាករណាម្នាក់មានឥទ្ធិពលក្នុងការប្រកួតដូចគាត់បែបនេះទេ។ ប្រហែលមានតែ Ronaldo Nazario ម្នាក់ប៉ុណ្ណោះ»។
សូមរម្លឹកថា កាលស្ថិតក្នុងវ័យ ១៨ ឆ្នាំ លោក Ronaldo Nazario បានលេងនៅក្លិប PSV ហើយពេលនោះលោករកបានគ្រាប់ស៊ុតបញ្ចូលទីចំនួន ៥២ គ្រាប់ ក្នុងចំណោមការលេង ៥៧ ប្រកួត មុនពេលផ្លាស់ទៅ Barcelona នៅអាយុ ១៩ ឆ្នាំ។
ដោយឡែក Yamal វិញ គិតត្រឹមវ័យ ១៨ ឆ្នាំនេះរូបគេបានឈ្នះពាន La Liga ចំនួន ២ លើក និងបានឈ្នះពានមួយចំនួនទៀតទាំងនៅក្លិប និងជម្រើសជាតិ អេស្ប៉ាញ៕
ប្រភព៖ KAMPUCHEATHMEY
