កីឡាការិនីបាល់ទះជម្រើសជាតិវៀតណាម ៣ នាក់ត្រូវបានស្នើឲ្យមានការស៊ើបអង្កេតជុំវិញភេទរបស់ពួកគេដោយមានការសង្ស័យអំពីភេទប្រុស ឬក៏ស្រី ខណៈរូបរាងកាយរបស់ពួកគេស្ទើរតែបុរសទាំងស្រុង។
កីឡាការិនី Nguyen Thi Bich Tuyen អាយុ ២៥ ឆ្នាំ កម្ពស់ ១.៨៨ម៉ែត្រ លេងតួនាទីជាអ្នកវាយផ្តាច់ក្នុងក្រុមធំបាល់ទះជម្រើសជាតិនារីវៀតណាម។ កាលពីថ្ងៃទី២១ ខែសីហា ឆ្នាំ ២០២៥ តាមការផ្សាយរបស់កាសែត The Nations Thailand ថា កីឡាការិនីរូបនេះបានដកខ្លួនចេញពីក្រុមជម្រើសជាតិ វៀតណាម សម្រាប់ការចូលរួមប្រកួតកីឡាបាល់ទះជើងឯកនារីពិភពលោក Women’s Volleyball World Championship នៅប្រទេសថៃ ដែលត្រូវចាប់ផ្តើមប្រកួតនៅថ្ងៃទី ២២ ខែសីហា ឆ្នាំ ២០២៥។
មានសេចក្តីរាយការណ៍ថា ប្រទេសថៃដែលជាម្ចាស់ផ្ទះរៀបចំការប្រកួតជើងឯកនារីពិភពលោកបានស្នើទៅ សហព័ន្ធកីឡាបាល់ទះអន្តរជាតិ (FIVB) ឲ្យស៊ើបអង្កេតជុំវិញភេទប្រុស ឬក៏ស្រី។ ទោះបីជាយ៉ាងណា សហព័ន្ធកីឡាបាល់ទះវៀតណាម បានប្រកាសថា កីឡាការិនី Nguyen Thi Bich Tuyen ដកខ្លួនពីក្រុមជម្រើសជាតិដោយសារបញ្ហាផ្ទាល់ខ្លួនប៉ុណ្ណោះ។
