គោរមៈ ច័ន្ទរាជ្យ បានឲ្យដឹងថា ការប្រកួតនៅឯវៀតណាមនេះគឺតានតឹង និងលំបាកក្នុងការយកជ័យជម្នះលើកីឡាករម៉ាឡេស៊ី Tan bo Meng ព្រោះដៃគូល្អចាប់ និងបុកខ្លាំងពីដើមទឹកទី១ មកម្ល៉េះ។ ប៉ុន្តែការខំប្រឹងតស៊ូការពារ និងវាយកែងបានល្អទើបធ្វើឲ្យកីឡាករ ម៉ាឡេស៊ី ខ្លាចកែង និងស្រុតកម្លាំងម្ដងបន្តិចៗរហូតខ្លួនអាចផ្ដួលឲ្យអាជ្ញាកណ្ដាលបញ្ឈប់ការប្រកួតតែម្ដង។
ការប្រកួតនៅឯវៀតណាមនេះគឺមានសារសំខាន់ចំពោះខ្លួនជាខ្លាំង ព្រោះជាការដណ្ដើមជ័យជម្នះជូនប្រជាជនកម្ពុជា បង្ហាញពីក្បាច់គុនខ្មែរ និងជាការផ្ញើសារទៅកាន់ពិភពលោកថា «ប្រទេសកម្ពុជារបស់ខ្ញុំមិនចង់មានសង្គ្រាមទេ» ដូច្នេះហើយបើទោះជាពិបាកខ្លាំងក៏ត្រូវតស៊ូយកឈ្នះដែរ។ សម្ដី គោរមៈ ច័ន្ទរាជ្យ។
កូនសិស្សលោក ហ៊ុន ច័ន្ទរាជ្យ បន្ថែមទៀតថា សូមប្រជាជនកម្ពុជាទាំងអស់រីករាយនូវជ័យជម្នះមួយនេះបន្ទាប់ពីការលំបាកទាំងផ្លូវកាយ និងផ្លូវចិត្ត នាពេលកន្លងមកពីការឈ្លានពានរបស់ប្រទេសជិតខាងកាលពីប៉ុន្មានថ្ងៃមុននេះតាមបណ្ដោយព្រំដែន។
បញ្ជាក់ដែរថា កាលពីយប់ថ្ងៃទី២ ខែសីហា ឆ្នាំ២០២៥ កីឡាករ គោរមៈ ច័ន្ទរាជ្យ បានផ្ដួលកីឡាករម៉ាឡេស៊ី ឲ្យអាជ្ញាកណ្ដាលបញ្ឈប់នៅទឹកទី២ នៃការប្រកួតដណ្ដើមខ្សែក្រវាត់ GMA នៅឯទីក្រុងហូជីមិញ ប្រទេសវៀតណាម។ ឥលូវនេះគ្រូបង្វឹក កីឡាករកម្ពុជាទាំង ៣រូបបានវិលត្រឡប់មកកាន់ប្រទេសកម្ពុជាវិញហើយកាលពីល្ងាចថ្ងៃទី៣ ខែសីហា ឆ្នាំ២០២៥ នេះ៕
ប្រភព៖ KAMPUCHEA THMEY
