កីឡាករ កូរ៉េខាងត្បូង Son Heung-min បានបំបែកកំណត់ត្រារបស់ខ្សែប្រយុទ្ធ Inter Miami កីឡាករ Lionel Messi ក្លាយជាកីឡាករលក់អាវដាច់បំផុតនៅលីគ អាមេរិក Major League Soccer បន្ទាប់ពីរូបគេផ្លាស់ទៅកាន់ក្លិប Los Angeles FC នៅរដូវកាលនេះ។
នៅរដូវកាល ២០២៥-២០២៦ Son បានសម្រេចចិត្តយ៉ាងភ្ញាក់ផ្អើល ដោយបានចាកចេញពីទ្រនំចាស់ Tottenham Hotspur ផ្លាស់ទៅកាន់ក្លិប LAFC។ ដ្បិតទើបផ្លាស់ទៅកាន់លីគ អាមេរិក បានពីរ បី សប្តាហ៍ ប៉ុន្តែពេលនេះ Son ត្រូវបានគេចាត់ទុកជាកីឡាករ ដែលមានប្រជាប្រិយភាពបំផុតនៅទីនោះបាត់ទៅហើយ ហើយមិនត្រឹមតែប៉ុណ្ណោះ រូបគេថែមទាំងបានបំបែកកំណត់ត្រារបស់ Messi ដែលជាប់ជាកីឡាករមានអ្នកគាំទ្របញ្ជាទិញអាវច្រើនបំផុតក្នុងខែដំបូងកាលពីឆ្នាំមុនទៀតផង។
យោងតាមការចុះផ្សាយដោយ Marca ដែលដកស្រង់បន្តចេញពី Front Office Sports បានឱ្យដឹងថា Lionel Messi បានបង្កើតកំណត់ត្រាមួយកាលពីឆ្នាំ ២០២៤ ដោយអាវរដូវកាលថ្មីនៅ Inter Miami របស់គាត់ ត្រូវបានលក់អស់ក្នុងចំនួនច្រើនបំផុតរហូតដល់ទៅ ៥០ ម៉ឺនអាវសម្រាប់រយៈពេល ១ ខែដំបូង។
យ៉ាងណាមិញ ចំពោះកំណត់ត្រានេះ ត្រូវបានបំបែកដោយខ្សែប្រយុទ្ធសញ្ជាតិ កូរ៉េខាងត្បូង វ័យ ៣៣ ឆ្នាំហើយ ហើយក៏គ្រោងនឹងវ៉ាកំណត់ត្រារបស់ខ្សែប្រយុទ្ធសញ្ជាតិ អាហ្សង់ទីន ក្នុងចំនួនច្រើនទៀតផង ដោយអាវលេខ ៧ នៅ LAFC របស់គេ កំពុងស្ថិតនៅលើផ្លូវ ក្នុងការលក់អស់រហូតដល់ជាង ១.៥ លានអាវសម្រាប់រយៈពេល ១ ខែដំបូងដូចគ្នានេះ។
គួរបញ្ជាក់ជាថ្មីថា Son ត្រូវបាន LAFC ចុះកិច្ចសន្យាយកបានពី Spurs នៅរដូវក្តៅនេះក្នុងតម្លៃ ៣៥ លានដុល្លារអាមេរិក អមជាមួយសុពលភាពកិច្ចសន្យាដល់ខែ ធ្នូ ឆ្នាំ ២០២៧៕
ប្រភព៖ KAMPUCHEATHMEY
