Markovic កីឡាការិនីស្រស់បំផុតលើលោក រកបានក្លិបថ្មីបន្តអាជីពបាល់ទាត់

ក្លិប Brooklyn FC នៅអាម៉េរិក ពេលថ្មីៗនេះ បានប្រកាសអំពីសមាជិកថ្មីពួកគេ ជាកីឡាការិនីរូបសស្រស់ Ana Maria វ័យ ២៦ឆ្នាំ។ ភ្លាមៗកីឡាការិនីសញ្ជាតិក្រូអាស៊ី ក៏បានចែករំលែកការបង្ហោះនោះ ជាមួយនឹងអ្នកគាំទ្រនាង អមជាមួយនឹងឯកសណ្ឋានក្រុមថ្មី លើការបង្ហោះរូបភាពនោះ។ បើតាមការចុះផ្សាយរបស់កាសែត Soccerdonna អ្នកគាំទ្រនាងសម្បែងអារម្មណ៍រំភើបខ្លាំង អ្នកខ្លះសន្យានឹងតាមទៅទស្សនាការប្រកួតរបស់នាងដល់អាម៉េរិក។

ការចូលរួមក្លិបនៅអាម៉េរិក ធ្វើឱ្យមិត្តភក្តិនាងជាកីឡាការិនីដូចគ្នា និងតារាល្បីៗមួយចំនួន អបអរសាទរដល់នាង ក្នុងនោះក៏មានកីឡាការិនីអង់គ្លេស Chloe Kelly ដែលទើបឈ្នះពានរង្វាន់ Euro 2025 បានផ្ញើសារជូនពរមិត្តរួមអាជីព។

កីឡាការិនីវ័យ ២៦ឆ្នាំ កន្លងមក លេងនៅក្លិប Sporting Braga ប៉ុន្តែខកខានមានក្លិបលេងតាំងពីខែកុម្ភៈមក ក្រោយក្លិបនៅព័រទុយហ្កាល់ផ្តាច់កុងត្រារបស់នាងចោល។ នៅក្លិបនោះនាងលេងបានតែ ៤ប្រកួតប៉ុណ្ណោះ ហើយក៏បាត់មុខចេញពីក្រុម។

​កីឡាការិនី Ana Maria Markovic បានទាក់ទាញអ្នកគាំទ្រច្រើនសន្ធឹកសន្ធាប់ ឱ្យចុចតាមដានលើបណ្តាញសង្គម តាមរយៈសម្រស់របស់នាង។ រូបរាងនិងរូបសម្រស់ បានធ្វើឱ្យនាងត្រូវបានមនុស្សជាច្រើនគិតថា ទោះគ្មានអាជីពបាល់ទាត់ នាងក៏អាចក្លាយជាតារាបង្ហាញម៉ូដថែមទៀតផង។ បណ្តាញសង្គម Instagram របស់ Ana Maria មានចំនួនអ្នកចុចតាមដានប្រមាណ​ ២,៩លាននាក់នៅពេលនេះ។

Ana Maria Markovic កើនក្នុងប្រទេសក្រូអាស៊ី និងបានផ្លាស់ទៅរស់នៅទីក្រុង Zurich ប្រទេសស្វ៊ីស ជាកន្លែងនាងចាប់ផ្តើមអាជីពបាល់ទាត់ នៅក្រុម FC Zurich មុនផ្លាស់ទៅចូលរួមក្រុម Grasshopper។ បន្ទាប់មក នាងបានទៅលេងឱ្យក្រុម FC Braga។ ​នៅជម្រើសជាតិក្រូអាស៊ី នាងបង្ហាញខ្លួនលេង ២០លើក និងរកបាន ២គ្រាប់៕

ប្រភព៖ THMEYTHMEY