សហព័ន្ធកីឡាបាល់ទះកម្ពុជា បានសម្រេចលើកពេលប្រកួតពានរង្វាន់សម្ដេចក្រឡាហោម អំឡុងខែធ្នូ ឆ្នាំ២០២៥ នេះគឺដើម្បីឲ្យកីឡាករក្រុមជម្រើសជាតិកម្ពុជាទាំងអស់មានពេលវេលាប្រមូលផ្ដុំហ្វឹកហាត់ជាមួយគ្នាបានយូរគ្រប់គ្រាន់។
លោក អាំង សិរីពិសិដ្ឋ បានឲ្យដឹងថា ការសម្រេចលើកពេលប្រកួតនេះគឺដើម្បីឲ្យកីឡាករជម្រើសជាតិបានប្រមូលផ្ដុំហ្វឹកហាត់ជាមួយគ្នាល្អគ្រប់គ្រាន់។ ពោលហាត់ជាមួយគ្នាបានយូរយល់ពីចិត្តគ្នាដើម្បីលេងឲ្យស៊ីចង្វាក់គ្រប់តួនាទី។
តាមបទពិសោធកន្លងទៅនៅ SEA V League នេះមើលឃើញថាការដែលប្រមូលផ្ដុំហ្វឹកហាត់ជាមួយគ្នាបានតិចតួចនេះធ្វើឲ្យកីឡាករលេងមិនសូវត្រូវគ្នាសោះរហូតទទួលបានលទ្ធផលមិនល្អដូចបានឃើញស្រាប់។ ដោយសារកីឡាករត្រូវបំពេញភារកិច្ចនៅបណ្ដាក្លឹបរៀងៗខ្លួនទើបមានពេលវេលាតិចតួចបានមកហ្វឹកហាត់ជុំគ្នា។
ដូច្នេះជាបទពិសោធត្រូវផ្អាកការប្រកួតពានរង្វាន់មួយចំនួនដែលប៉ះពាល់ដល់ការប្រមូលផ្ដុំហ្វឹកហាត់ត្រៀមប្រកួតតំណាងជាតិ ឬការប្រកួតជាស៊ីហ្គេមជាដើម។ ការលើកពេលប្រកួតនេះដើម្បីជាការត្រៀមលក្ខណៈសម្បត្តិឲ្យបានល្អគ្រប់ជ្រុងជ្រោយសម្រាប់ក្រុមជម្រើសជាតិបាល់ទះកម្ពុជា។
បញ្ជាក់ដែរថា សហព័ន្ធបាល់ទះកម្ពុជាបានប្រកាសប្រាប់ដល់បណ្ដាក្លឹបចំណុះទាំង ៣២រួចហើយពីការពន្យាពេលប្រកួតពានរង្វាន់សម្ដេចក្រឡាហោម អំឡុងខែធ្នូ ឆ្នាំ២០២៥ ទៅអំឡុខែមករា-កុម្ភៈ ឆ្នាំ២០២៦ វិញបន្ទាប់ពីបញ្ចប់ស៊ីហ្គេម លើកទី៣៣ នេះហើយ៕
ប្រភព៖ KAMPUCHEATHMEY
