Joyline Chepngeno កីឡាការិនីរត់ចម្ងាយឆ្លងឧបសគ្គ (Ultra Marathon) សញ្ជាតិកេនយ៉ា ដែលជាម្ចាស់ជើងឯក ព្រឹត្តិការណ៍ OCC UTMB Mont Blanc និង Sierre Zinal ឆ្នាំ ២០២៥ ត្រូវបានហាមឃាត់រយៈពេល ២ឆ្នាំ ក្រោយធ្វើតេស្តរកឃើញសារធាតុហាមឃាត់។ កីឡាការិនីចិន Miao Yao ទទួលបានជើងឯក OCC UTMB World Serie ឆ្នាំ២០២៥ ជំនួសវិញ។
កីឡាការិនីវ័យ ២៧ឆ្នាំ ត្រូវបានគេតេស្តរកឃើញសារធាតុហាមឃាត់ ដូចជាថ្នាំបំបាត់ការរលាក និងជំនួយកម្លាំង ក្រោយនាងឈ្នះ ការរត់ប្រណាំងឆ្លងឧបសគ្គ Sierre-Zinal WMRA (World Mountain Running Association) World Cup ឆ្នាំ ២០២៥ នៅក្នុងប្រទេសស្វ៉ីស។ ព្រឹត្តិការណ៍ Sierre Zinal ជាការរត់ប្រណាំងចម្ងាយ ៥០គីឡូម៉ែត្រ ធ្វើឡើងនៅតាមបណ្តោយភ្នំនៅខេត្ត Valais ប្រទេសស្វ៉ីស ជាប្រចាំរាល់ខែសីហា ហើយជាការរត់ឆ្លងកាត់ឧបសគ្គឡើងចុះភ្នំ កម្ពស់ជាង ៤ពាន់ម៉ែត្រ។
បើតាមអង្គភាពសុច្ចរិតភាពអត្តពលិក (AIU) កីឡាការិនី Chepngeno បានធ្វើតេស្តសុខភាព រកឃើញប្រើប្រាស់សារធាតុហាមឃាត់ ការពារការរលាក និងជំនួយដល់កម្លាំងក្រោយពេលរត់ដល់ទី។ នាងត្រូវបានអ្នករៀបចំហាមឃាត់មិនឱ្យចូលរួមការប្រកួត ២ឆ្នាំ ហើយរាល់សមិទ្ធផលនាងសម្រេចបានក្នុងការរត់ប្រណាំងឧបសគ្គកន្លងមក តាំងពីថ្ងៃទី៩ ខែសីហា ឆ្នាំ ២០២៥ មក ក៏នឹងត្រូវដកសិទ្ធិចេញវិញដូចគ្នា។
តំណែងជើងឯកនៅការរត់ឆ្លងឧបសគ្គនៅព្រឹត្តិការណ៍ OCC (Orsieres Chamonix Trient) ជាការរត់ប្រណាំងឧបសគ្គមួយចំណោម ៣ របស់ព្រឹត្តិការណ៍រត់ឆ្លងឧបសគ្គផ្តាច់ព្រ័ត្រ UTMB World Serie តែងធ្វើឡើងនៅប្រទេសបារាំង ដែលកីឡាការិនីវ័យ ២៧ឆ្នាំ បានឈ្នះ ក៏ត្រូវបានដកចេញវិញផងដែរ។
អ្នករៀបចំការរត់ប្រណាំង Sierre-Zinal បានប្រកាសហាមឃាត់ កីឡាករសញ្ជាតិកេនយ៉ា និងក្រុមគ្រូបង្វឹក ក៏ដូចជាក្រុមរត់របស់នាង សម្រាប់ព្រឹត្តិការណ៍រត់នៅពេលអនាគត។ អ្នករៀបចំក៏បានទាមទារឱ្យកីឡាការិនី Joyline Chepngeno សងប្រាក់រង្វាន់ ត្រឡប់ទៅកាន់ស្ថាប័នរៀបចំវិញផងដែរ។
បន្ទាប់ពីការប្រកាសហាមឃាត់លើ កីឡាការិនីវ័យ ២៧ឆ្នាំ នោះមក ក្រុមហ៊ុនមួយចំនួនជាអ្នកឧបត្ថម្ភដល់រូបនាង ក៏បានប្រកាសផ្តាច់កិច្ចសន្យាភ្លាមៗដូចគ្នា ដោយលើកឡើងថា កីឡាការិនីសញ្ជាតិកេនយ៉ា ធ្វើឱ្យប៉ះពាល់ដល់តម្លៃនៃកីឡា ការបំពានច្បាប់ផ្សេងៗដែលពិបាកក្នុងការទទួលយក។
ក្រោយកីឡាការិនី Chepngeno ត្រូវបានដកសិទ្ធិ និងតំណែងជើងឯក កីឡាការិនីចិន Miao Yao ត្រូវបានអ្នករៀបចំដំឡើងឱ្យក្លាយជាជើងឯក ក្រោយនាងបញ្ចប់ចំណាត់ថ្នាក់លេខ ២ អំឡុងព្រឹត្តិការណ៍ OCC UTMB World Serie ឆ្នាំ២០២៥។ ចំណែកកីឡាការិនី Caroline Kimutai សញ្ជាតិកេនយ៉ាម្នាក់ទៀត ត្រូវបានដំឡើងឱ្យក្លាយជាជើងឯកព្រឹត្តិការណ៍ Sierre Zinal ឆ្នាំ២០២៥៕
ប្រភព៖ THMEYTHMEY
