អេស្ប៉ាញ ព្រមានពហិការ World Cup ២០២៦ បើមានវត្តមានអ៊ីស្រាអែល

សហព័ន្ធកីឡាបាល់ទាត់អេស្ប៉ាញ (SFF) សង្កត់ធ្ងន់ថា ស្ថាប័នកីឡាខ្លួនមិនអាចអើពើបាននោះទេ ខណៈដែលជនស៊ីវិលប៉ាឡេស្ទីនរាប់សែននាក់នៅតំបន់កាហ្សាត្រូវបានសម្លាប់ដោយអ៊ីស្រាអែល។ ពលរដ្ឋ ជាពិសេសភាគច្រើនជាកុមារ ទទួលរងភាពអត់ឃ្លាន បាត់បង់ផ្ទះសំបែង និងផ្លាស់ទីលំនៅជាដើម។ ឃើញស្ថានភាពបែបនេះ SFF បានព្រមានដោយជំហររឹងមាំ ថាខ្លួននឹងពហិការមិនចូលរួមព្រឹត្តិការណ៍បាល់ទាត់ពិភពលោក ដែលរៀបចំនៅអាម៉េរិក កាណាដា និងម៉ិកស៊ិកឡើយ ប្រសិនបើមានវត្តមានក្រុមអ៊ីស្រាអែល។

​វិធានការរបស់អេស្ប៉ាញ គឺដើម្បីចង់ដាស់ស្មារតីមនុស្សជុំវិញពិភពលោកឱ្យដឹង​ថា​អ៊ីស្រាអែល​មិន​គួរ​ត្រូវ​បាន​ផ្តល់​សិទ្ធិ​ក្នុង​ព្រឹត្តិការណ៍​កីឡាលំដាប់​ពិភពលោក​ឡើយ ខណៈ​ប្រទេសនេះបន្ត​យុទ្ធនាការ​បំផ្លិចបំផ្លាញ​នៅតំបន់​ហ្គាហ្សា។

ដោយឡែក អ្នករិះគន់ភាគច្រើនបានចាត់ទុកថា FIFA មានស្តង់ដារពីរចំពោះរុស្ស៊ី និងអ៊ីស្រាអែល។ ស្តង់ដារពីរ ដោយសារុស្ស៊ីត្រូវបានហាមឃាត់ពីការប្រកួតអន្តរជាតិ ដូចជាព្រឹត្តិការណ៍អូឡាំពិក និងព្រឹត្តិការណ៍ដែលរៀបចំដោយ FIFA បន្ទាប់ពីរុស្ស៊ីបង្កសង្គ្រាមនឹងអ៊ុយក្រែន ខណៈដែលអ៊ីស្រាអែលនៅតែបន្តទទួលនិទណ្ឌភាព ទោះបីជាមានភស្តុតាងជាក់ស្តែងនៃឧក្រិដ្ឋកម្មសង្គ្រាមក៏ដោយ។

សេចក្តីប្រកាសរបស់ក្រុមម្ចាស់ជើងឯកកីឡាបាល់ទាត់ពិភពលោក ឆ្នាំ ២០១០ បានបន្ថែមទម្ងន់ដល់ការទាមទារដែលកំពុងកើនឡើងសម្រាប់ FIFA និងគណៈកម្មាធិការអូឡាំពិកអន្តរជាតិ (IOC) ដើម្បីធ្វើសកម្មភាពប្រកបដោយភាពស៊ីចង្វាក់គ្នា និងយុត្តិធម៌។ សម្រាប់មនុស្សជាច្រើន ការមិនរាប់បញ្ចូលប្រទេសអ៊ីស្រាអែលពីកីឡាពិភពលោក មិនមែនភ្ជាប់នឹងនយោបាយនោះទេ ប៉ុន្តែជាការលើកកម្ពស់គោលការណ៍ជាមូលដ្ឋាននៃមនុស្សជាតិ។ 

សកម្មភាពជាច្រើនបង្ហាញថា ពិភពលោកកាន់តែមិនចង់ឱ្យភាពឃោរឃៅរបស់អ៊ីស្រាអែលមើលទៅមានលក្ខណៈធម្មតា ដ្បិតប្រទេសនេះ បានប្រព្រឹត្តិឧក្រិដ្ឋកម្មសង្គ្រាមប្រល័យពូជសាសន៍ លើជនស៊ីវិញប៉ាឡេស្ទីននៅតំបន់កាហ្សាយ៉ាងឃោឃៅ៕

ប្រភព៖ THMEYTHMEY